ზუგდიდში, ბერანძის ქუჩა N10-ში მდებარე ყოფილი სააფთიაქო სამმართველოს შენობა დევნილთა სამინისტრომ საცხოვრებელ ფართად გადააკეთა და დღეს, 74 დევნილ ოჯახს, საქართველოს ლტოლვილთა და განსახლების მინისტრმა დავით დარახველიძემ ახალი საცხოვრებელი ბინების გასაღებები გადასცა. სარემონტო-სარეაბილიტაციო სამუშაოები ტენდერში გამარჯვებულმა სამშენებლო კომპანია შპს „ბლოკ ჯორჯიამ“ განახორციელა და მისმა მთლიანმა ღირებულებამ ერთი მილიონი ლარი შეადგინა. დევნილებს სიტყვით საქართველოს ლტოლვილთა და განსახლების მინისტრმა დავით დარახველიძემ მიმართა, სამშენებლო კომპანიის მიერ შესრულებულ საქმიანობაზე უკმაყოფილება გამოთქვა და აქვე მდგომარეობის გამოსწორებას შეჰპირდა. მინისტრის თქმით, დევნილთა სამინისტრო მომავალში უფრო სწრაფი ტემპით გააგრძელებს დევნილთა განსახლების პროცესს და ქვეყნის მასშტაბით თითოეული დევნილი ოჯახი საცხოვრებელი ფართით იქნება დაკმაყოფილებული. "აფხაზეთში დაბრუნების შემთხვევაში აღნიშნული ფართი მაინც დევნილის საკუთრებაში დარჩება" - განაცხადა დავით დარახველიძემ. დევნილებს, ასევე სიტყვით სამეგრელო-ზემო სვანეთის რწმუნებულმა ლევან შონიამ მიმართა და მათ დღემდე არსებული პრობლემების გამკლავებისთვის მადლობა გადაუხადა და აფხაზეთში დაბრუნება უსურვა. აღნიშნულ ობიექტზე 2 ოთახიანი ბინა 2008 წლის აგვისტოს ომში საბრძოლო მოქმედებების დროს დაღუპულ კაპრალ ბადრი ბერანძის მშობლებსაც გადაეცათ. ცნობისთვის, ქუჩას, რომელზეც რეაბილიტირებული კორპუსია განთავსებული ბადრი ბერანძის სახელი ეწოდა. ღონისძიებას ესწრებოდნენ: დევნილთა და განსახლების მინისტრი დავით დარახველიძე, სამინისტროს რეგიონული სამმართველოს უფროსი ირაკლი ქოჩუა, სამეგრელო-ზემო სვანეთის რწმუნებული ლევან შონია, ზუგდიდის მუნიციპალიტეტის გამგებელის მოვალეობის შემსრულებელი ედიშერ თოლორაია, ადგილობრივი არასამთავრობო ორგანიზაციები და სახალხო დამცველის ოფისის წარმომადგენლები.