გაუპატიურების მცდელობაში ბრალდებულის გოგა ანჩაბაძის საქმის არსებით განხილვაზე, დღეს 27 მარტს, ზუგდიდის რაიონულ სასამართლოში ბრალდების მხარემ მოწმის სახით დაზარალებული ანა ძაპტაშვილი და მისი დედა რუსუდან ლომაია წარადგინა. სასამართლო სხდომა დაზარალებულის დაკითხვის დროს დახურული იყო. ბრალდებულ ანჩაბაძის ადვოკატმა ალექსანდრე თათელიშვილმა  სასამართლო სხდომის შემდეგ ჟურნალისტებთან საუბარში განაცხადა, რომ ძაპტაშვილმა გარკვეულ კითხვებს გასცა პასუხები, ნაწილი კი უპასუხოდ დატოვა. „მის მიერ დღეს მიცემული ჩვენება და გამოძიებისთვის ადრე მიცემული ჩვენება ურთიერთსაწინააღმდეგო გარემოებებს შეიცავს და დაცვის მხარე ამას პაექრობის დროს გამოიყენებს,“-აღნიშნავს თათელიშვილი. მისივე თქმით, ძაპტაშვილის დაკითხვის დროს საკმაოდ საინტერესო დეტალი გამოიკვეთა. კონკრეტულად ის, რომ ანა ძაპტაშვილმა მისი გაუპატიურების მცდელობის შესახებ განცხადება, მხოლოდ მას შემდეგ შეიტანა, რაც იგი პროკურატურამ მეუღლის, კონსტანტინე გულორდავას სისხლის სამმართლის საქმეზე დაკითხა. ძაპტაშვილის დაკითხვის სხვა დეტალებზე საუბრისგან ალექსანდრე თათელიშვილმა თავი შეიკავა. 2013 წლის 10 ნომბერს დაზარალებულად მიჩნეულ ძაპტაშვილსა და ბრალდებულ ანჩაბაძეს შორის მომხდარ ინციდენტზე სასამართლო პროცესზე ისაუბრა რუსუდან ლომაიამ. მისი თქმით, ანჩაბაძესთან მომხდარი ინციდენტის შემდეგ მის ქალიშვილს ტანსაცმელზე აღენიშნებოდა დაზიანებები და ფეხსაცმლის ქუსლები ჰქონდა დამტვრეული. „ანა ძალიან შეშინებული იყო, ანჩაბაძე მას ემუქრებოდა ეს ამბავი არ გაახმაურო თორემ, სისხლი დაიღვრება, ქმარს მოგიკლავო.“-აღნიშნა რუსუდან ლომაიამ. მისივე თქმით, დაზარალებულმა სწორედ ამიტომ ვერ შეძლო ქმრისთვის თავიდანვე გაემხილა ის, რაც მასსა და ანჩაბაძეს შორის მოხდა. დღეს გამართულ სასამართლო პროცესზე ანჩაბაძემ რამდენჯერმე მიიღო შენიშვნა მოწმის მიმართ გაკეთებული რეპლიკებისთვის. ბრალდების მხარემ სასამართლოს ბრალდებულის სხდომიდან გაძევების შეუმდგომლობითაც კი მიმართა, თუმცა მოსამართლემ შუამდგომლობა არ დააკმაყოფილა. შეგახსენებთ, რომ 12 ნოემბერს გოგა ანჩაბაძე კონსტანტინე გულორდავამ მისი ცოლის, ანა ძაპტაშვილის გაუპატიურების მცდელობის გამო სცემა და მას მრავლობითი დაზიანებები მიაყენა. მკურნალობის კურსს ანჩაბაძე ჯერ ზუგდიდში, შემდეგ კი ქუთაისის კლინიკურ საავადმყოფოში გადიოდა. სამართალდამცავებმა იგი 2013 წლის 20 დეკემბერს დააკავეს. შემდეგი სასამართლო სხდომა საქმეზე მიმდინარე წლის 14 აპრილს ჩაინიშნა.