Google-მა განაცხადა, რომ 15 აპრილიდან, აშშ-ის ბაზარზე Google Glass-ის მასობრივ გაყიდვებს იწყებს. თავდაპირველად, ეს ინფორმაცია The Verge –მა გაავრცელა და შემდეგ ის კომპანიამ დაადასტურა. კორპორაციამ განაცხადა, რომ სათვალეების გაყიდვა არის გეგმის ნაწილი, რომელიც მოწყობილობა Google Explorer-ის ტესტირების გაფართოებას უკავშირდება. „შემდეგ ორშაბათს, 15 აპრილის დილის 6 საათიდან, Glass Explorer-ის პროგრამის ფარგლებში რამდენიმე ადგილს გავხსნით. აშშ-ის ნებისმიერ სრულწლოვან მოქალაქეს შეეძლება პროგრამის მონაწილე გახდეს, თუ ის ეწვევა ჩვენს საიტს და იყიდის სათვალეს, $1.5 ათასად, გადასახადების გარეშე“, - ნათქვამია Google-ის განცხადებაში, სადაც ასევე მითითებულია, რომ ტესტირების პროგრამაში მონაწილეობის მსურველთა რაოდენობა შეზღუდულია. Google-ში განსაკუთრებით აღნიშნეს, რომ სათვალეების შეძენა მხოლოდ აშშ-ის რეზიდენტებს შეეძლებათ, ხოლო სხვა ქვეყნების მოქალაქეებს დაცდა მოუწევთ, გაყიდვების ოფიციალურ სტარტამდე. ცოტა ხნით ადრე კი ცნობილი გახდა, რომ ბოსტონში, სამედიცინო ცენტრ Beth Israel-ში მომუშავე ექიმებმა Google-ის „ჭკვიანი სათვალეების“ აქტიური გამოყენება დაიწყეს, მას შემდეგ, რაც ამ მოწყობილობის საშუალებით ერთ-ერთი პაციენტის გადარჩენა გახდა შესაძლებელი.