ზუგდიდის მუნიციპალიტეტის მოსახლეობა პირდაპირი წესით ქალაქის მერს და გამგებელს წელს პირველად აირჩევს. ზუგდიდში, პოლიტიკური პარტიები არჩევნებისთვის , შეიძლება ითქვას, აქტიურად ემზადებიან. თუმცა,ამ დრომდე, ცნობილია მხოლოდ „ერთიანი ნაციონალური მოძრაობის კანდიდატების ვინაობა. „ ნაციონალური მოძრაობიდან“ ზუგდიდის მერობისთვის, საკრებულოს აპარატის ამჟამინდელი უფროსი თეიმურაზ ბასილაია იბრძოლებს, ხოლო გამგებლობისთვის - სამეგრელო-ზემო სვანეთის ყოფილი გუბერნატორი, თენგიზ გუნავა. ყოფილმა მმართველმა პარტიამ კანდიდატები 12 აპრილს, ზუგდიდში გამართულ პარტიის მანიფესტაციაზე წარადგინა. ყოფილი მმართველი პარტიისგან განსხვავებით, „ქართული ოცნებაში“ ზუგდიდის მერის კანდიდატურაზე მსჯელობა ჯერაც მიმდინარეობს. პარტიაში  სავარაუდო კანდიდატების ვინაობის დასახელებისგან თავს იკავებენ, თუმცა,  არსებული ინფორმაციით, ამ თანამდებობაზე აქტიურად განიხილება სამი კანდიდატი: ზუგდიდის გამგებლის მოადგილის მოვალეობის შემსრულებელი მერაბ ქვარაია, ბანკ “რესპუბლიკას” ზუგდიდის ფილიალის მენეჯერი დავით ვერავა და ზუგდიდის საკრებულოს ყოფილი თავმჯდომარე ირაკლი გოგოხია. „ქართული ოცნებიდან“ ზუგდიდის თვითმმართველი თემის გამგებლობაზე კენჭს ზუგდიდის მუნიციპალიტეტის გამგებლის მოვალეობის შემსრულებელი ედიშერ თოლორაია იყრის. ეს ინფორმაცია რადიო „ათინათს“ ზუგდიდის გამგეობაში დაუდასტურეს. რაც შეეხება არასაპარლამენტო ოპოზიციას, ზუგდიდში, პირველები ამ მხრივ "ეროვნულ-დემოკრატიული პარტიის" წარმომადგენლები გააქტიურდნენ. ედპ-მ საზოგადოებას ზუგდიდის მერობის კანდიდატად ექიმი ვახტანგ ყუფუნია,ჯერ კიდევ მარტის დასაწყისში წარუდგინა. „ჯერ არ გვაქვს გადაწყვეტილი საერთოდ გვეყოლება თუ არა ამ არჩევნებზე გამგებლის კანდიდატურა. საკითხზე ჯერ კიდევ ვმსჯელობთ “, - ამბობს ედპ-ს ზუგდიდის ორგანიზაციის ლიდერი კახა ჯიქია. „დემოკრატიული მოძრაობა - ერთიანი საქართველოს” ზუგდიდის მერობის და გამგებლის კანდიდატურების ვინაობა ჯერჯერობით უცნობია. როგორც პარტიის სამეგრელო-ზემო სვანეთის კოორდინატორი ლერი გელენავა ამბობს, კანდიდატების შერჩევა ამ დრომდე მიმდინარეობს. „კანდიდატების ვინაობა უახლოეს დღეებში დასახელდება. ჯერჯერობით კონკრეტულად ვერაფერს გეტყვით“, ამბობს ლერი გელენავა. ზუგდიდში, თვითმმართველობის არჩევნებისთვის ასევე ემზადება პარტია „თავისუფალი საქართველო“, რომლმაც „ახალ მემარჯვენებთან“ ერთად საარჩევნო ბლოკი „არასაპარლამენტო ოპოზიცია“( კახა კუკავა, ფიქრია ჩიხრაძე) შექმნა. აღნიშნული ბლოკის ზუგდიდის მერობის კანდიდატი ოთარ ჭითანვა იქნება, ხოლო გამგებლის კანდიდატურაზე მსჯელობა  გრძელდება. „გამგებლის პოსტზე სამი კანდიდატი გვყავს, მაგრამ გადაწყვეტილება ჯერ არ მიგვიღია. ერთ-ერთი მათგანია ლაშა ყორშია, დანარჩენი ორის ვინაობას მათივე თხოვნით ვერ გაგიმხელთ“,- ამბობს ადგილობრივი ორგანიზაციის ლიდერი გურამ შელია. ცნობისთვის, საქართველოში თვითმმართველობის არჩევნები 15 ივნისს გაიმართება. ქვეყნის მასშტაბით 71 საკრებულო, 12 ქალაქის მერი და 59 მუნიციპალიტეტის გამგებელი აირჩევა.