ზუგდიდში,სოფელ კოლხიდაში, 2 თვის წინ თვითმკვლელობის შედეგად გარდაცვლილი, 30 წლის ცეზარ შონიას ოჯახის წევრებმა და ახლობლებმა დღეს,23 აპრილს სამეგრელო-ზემო სვანეთის საოლქო პროკურატურასთან შონიას გარდაცვალების საქმის დახურვა გააპროტესტეს და მისი ხელახლა აღძვრა მოითხოვეს. ამასთან, გარდაცვლილის ოჯახის წევრებს ცეზარ შონიას თვითმკვლელობის ვერსიის არ სჯერათ და მომხდარში ცოლის ნათესავებს ადანაშაულებენ. შონიას ოჯახის წევრების ეჭვებს ექსპერტიზის დასკვნაც აღრმავებს, რომელშიც წერია, რომ გარდაცვლილს სხეულზე მრავლობითი დაზიანებები აღენიშნება. ცეზარ შონიას ახლობლები ზუგდიდის რაიონულ პროკურორს, ლევან სალიას შეხვდენენ და როგორც ისინი ამბობენ, პროკურორისგან საქმის ხელახლა აღძვრის და ობიექტური გამოძიების პირობა მიიღეს. „პროკურორთან მიღწეულია შეთანხმება. დაიკითხებიან ახალი მოწმეები, რომლებიც ჩვენ მოვითხოვეთ“, - აბობს გარდაცვლილის და თამარ შონია. შონიას ოჯახის წევრების თქმით, დღეს დილით პროკურატურის შენობაში შევიდა გარდაცვლილის ცოლი, თუმცა, მათთვის უცნობია,თუ რასთან დაკავშირებით იმყოფებოდა ის პროკურატურაში. ცნობისთვის: პროკურატურის შენობის წინ ცეზარ შონიას ოჯახის წევრებმა და ახლობლებმა საპროტესტო აქცია 16 აპრილსაც გამართეს. ისინი საქმის გადაკვალიფიცირებას და ობიექტურ გამოძიებას ითხოვდნენ. ცეზარ შონიას დედის განმარტებით, მისი შვილი სიმამრის სახლში ცოლის სანახავად წავიდა, თუმცა, მოგვიანებით ის სიმამრის სახლის წინ თოკით ხეზე ჩამომხრჩვალი იპოვეს.