დღეს, ტელეკომპანია „სამეგრელოს“დირექტორმა დარეჯან კვარაცხელიამ, მაუწყებლობის აღდგენის  მოთხოვნით, სამეგრელო -ზემო სვანეთის საოლქო პროკურატურას მიმართა. დარეჯან კვარაცხელიას განცხადებით, მიმდინარე წლის იანვარში კომუნიკაციების ეროვნულმა კომისიამ ტელეკომპანიას შეუჩერა სამაუწყებლო ლიცენზია, ვინაიდან დამაბრკოლებელ გარემოებად სახელმწიფოს მხრიდან წილის ფლობა ჩათვალა. ტელეკომპანიის დირექტორი აცხადებს, რომ ტელევიზიას რთულ პირობებში უხდებოდა მუშაობა, როდესაც იზღუდებოდა თავისუფალი სიტყვა. მისი თქმით, პირველ რიგში ის ტელევიზიის მაუწყებლობის აღდგენის საკითხის მოგვარებას შეეცდება და შემდეგ იფიქრებს მეწილეებთან დაკავშირებით სამართლებრივ ასპექტებზე. “ძალიან მინდა რეგიონში იყოს თავისუფალი მედია, კონკურენცია!“-დასძინა  დ.კვარაცხელიამ. დარეჯან კვარაცხელიამ ჟურნალისტებთან საუბრისას განაცხადა, რომ ტელეკომპანიისთვის ლიცენზიის აღდგენასთან დაკავშირებით მან უკვე მიმართა ადამიანის უფლებათა დაცვის კომიტეტის თავმჯდომარეს, ეკა ბესელიას. ასევე, რეგიონული ტელევიზიების საკითხი, უკვე შეისწავლა პარლამენტის საგამოძიებო კომიტეტმა და ის შემდგომი რეაგირებისთვის პროკურატურას გადაეცა. შეგახსენებთ, რომ მიმდინარე წლის იანვარში საქართველოს კომუნიკაციების ეროვნულმა კომისია მშპს ,,სამეგრელო–ზემო სვანეთის ტელერადიოკომპანია "სამეგრელოს" კერძომაუწყებლობის №B121 და №B122 ლიცენზიები გააუქმა. კომუნიკაციების ეროვნული კომისიის ინფორმაციით, ტელეკომპანია "სამეგრელოს" ლიცენზიების გაუქმებას კომისიის აპარატის რადიოსიხშირეთა მართვის დეპარტამენტის მიერ ჩატარებული მონიტორინგის შედეგები დაედო საფუძვლად. შემოწმების შედეგად, გაირკვა, რომ ტელეკომპანია "სამეგრელო", რომელიც ფლობდა სამაუწყებლო ლიცენზიებს ქ. ზუგდიდსა და ქ. სენაკში, 2013 წლის 4 ივლისიდან, 132 დღის განმავლობაში არ ახორციელებდა მაუწყებლობას. "მაუწყებლობის შესახებ" საქართველოს კანონის თანახმად კი, სამაუწყებლო ლიცენზიის მფლობელის მიერ ლიცენზიით განსაზღვრული საქმიანობის შეწყვეტა წელიწადში ზედიზედ 3 თვეზე მეტი (90 დღე) ვადით ან ერთი წლის განმავლობაში 120 დღით, ლიცენზიის გაუქმების საფუძველი ხდება. სწორედ ამ გარემოებების გათვალისწინებით, საქართველოს კომუნიკაციების ეროვნულმა კომისიამ ტელეკომპანია "სამეგრელოს" სამაუწყებლო ლიცენზიების გაუქმების თაობაზე გადაწყვეტილება მიიღო. მანამდე, ტელე-რადიო კომპანია „სამეგრელოს“ კომისიის 2012 წლის 13 იანვრის გადაწყვეტილებით B121 და B122 ლიცენზიებით სარგებლობის უფლება 10 წლიანი ვადით გაუხანგრძლივდა. ტელეკომპანია „სამეგრელო“ შპს „ინფოვესტის“ ეკუთვნის, რომლის დირექტორიც და 67 პროცენტის მფლობელიც მამუკა თოდუაა. თოდუა სამეგრელო-ზემო სვანეთში საქართველოს პრეზიდენტის რწმუნებულის თანამდებობაზე მუშაობდა. დარჩენილი 33 პროცენტი კი, გელა ჟვანიას საკუთრებაა.