წალენჯიხის მუნიციპალიტეტში, საქართველოს გაერთიანებული წყალმომარაგების კომპანიის გენერალური დირექტორის პირველი მოადგილე გიორგი ქუთათელაძე,ამავე კომპანიის საპროექტო დეპარტამენტის უფროსის მოვალეობის შემსრულებელი ზვიად მანდარია,სამეგრელო ზემო–სვანეთის გაერთიანებული წყალმომარაგების კომპანიის მენეჯერი დავით შელეგია და სამეგრელო ზემო–სვანეთის მხარის სახელმწიფო რწმუნებულის პირველი მოადგილის მოვალეობის დროებით შემსრულებელი, კობა ქანთარია ადგილობრივ მოსახლეობას შეხვდნენ. ქალაქ ჯვარში იგეგმება წყალმომარაგების სისტემის სრული რეაბილიტაცია, რისთვისაც სახელმწიფომ 2 მილიონ ლარზე მეტი გამოყო.აღნიშნული სამუშაოების განსახორციელებლად წყალმომარაგების კომპანია უახლოეს დღეებში ტენდერს გამოაცხადებს.ქსელის რეაბილიტაციის შემდეგ ქ. ჯვარის მოსახლეობა სასმელ წყალს გაუმჯობესებული გრაფიკით მიიღებს. ჯვარელებთან შეხვედრის შემდეგ კომპანიის წარმომადგენლებმა მუნიციპალიტეტის ხელმძღვანელ პირებთან ერთად დაათვალიერეს კაშხლის ტერიტორიაზე არსებული „ცაღრას"სათავე ნაგებობა, საიდანაც ამ ეტაპზე ხდება მოსახლეობის წყლით უზრუნველყოფა.ამასთან,მთავრობის განკარგულებით, ქალაქ წალენჯიხის, კერძოდ გაგარინის, სოსელიას, ფიროსმანის ქუჩებსა და სასარიოს უბანში მოეწყობა წყლის ჭაბურღილები, რისთვისაც მთავრობამ ნახევარი მილიონი ლარი გამოყო.სამუშაოების შესასრულებლად,გაერთიანებული წყალმომარაგების კომპანია უახლოეს დღეებში ტენდერს გამოაცხადებს. აღსანიშნავია,რომ ზემოთ ჩამოთვლილი ქუჩებისა და უბნის მოსახლეობას წყალი წლების მანძილზე არასტაბილური გრაფიკით მიეწოდებოდათ. ხშირი გვალვების გამო კი მოსახლეობა საერთოდ უწყლოდ რჩებოდა.