„ერთიანი ნაციონალური მოძრაობის“ ზუგდიდის მერობის კანდიდატი თეიმურაზ ბასილაია ამბობს, რომ „ნაციონალურმა მოძრაობამ“ ხელისუფლებაში ყოფნის დროს შეცდომები დაუშვა, თუმცა ფიქრობს, რომ ისინი საზოგადოების ნდობის მოპოვებას კვლავ შეძლებენ. ბასილაია ყველაზე ძლიერ კონკურენტად „ქართული ოცნების“ ზუგდიდის მერობის კანდიდატს, ირაკლი გოგოხიას მიიჩნევს. იგი თვითმმართველობის არჩევნებზე მეორე ტურს არ გამორიცხავს. რადიო „ათინათი“ გთავაზობთ ინტერვიუს თეიმურაზ ბასილაიასთან. რადიო „ათინათი“: როგორ ფიქრობთ, რა დამსახურებების მიხედვით შეგარჩიათ „ნაციონალურმა მოძრაობამ“? თეიმურაზ ბასილაია: მე გახლავართ 22 წლის სტაჟის მქონე საჯარო მოხელე. მათ შორის,  გუბერნიის ადმინისტრაციისა და საკრებულოს აპარატში, სხვადასხვა პოზიციებზე დაახლოებით 12 წელის მანძილზე ვიმუშავე. აქედან გამომდინარე, მაქვს საჯარო სამსახურში მუშაობისა და საზოგადოებასთან ურთიერთობის გამოცდილება. ასევე მაქვს, პარტიაში მუშაობის გამოდიცდილება.  ალბათ,  გარკვეული პარალელები იმასაც გაევლო, რომ ჩემი მუშაობის პერიოდში სამი პრეზიდენტი და ექვსი გუბერნატორი შეიცვალა, ასე რომ ხელისუფლებათა ცვლა ჩემს პრაქტიკაში ყოფილა, რამაც გარკვეული გამოცდილება შემძინა . ჩატარდა ასევე, ზოგადი გამოკითხვა და ამ ეტაპზე მე ავღმოვჩდი ის პიროვნება, რომელზეც არჩევანი გაკეთდა. საბედნიეროდ მე არ ვიყავი ერთადერთი კანდიდატურა, რომელიც ამ თანამდებობაზე განიხილებოდა, თუმცა, საერთო ინტერესებიდან გამომდინარე,  სწორედ ეს გადაწყვეტილება იქნა მიღებული. რადიო „ათინათი“:  ვის თვლით მთავარ კონკურენტად და როგორია სხვა კანდიდატების შანსები? თეიმურაზ ბასილაია: პოლიტიკური ბრძოლა რთული  პროცესია, მით უმეტეს, განსაკუთრებით ადგილობრივ არჩევნებზე. ამ დროს აქცენტი უფრო ინდივიდუალიზმზე კეთდება.  პერსონა, რომელიც კანდიდატია, რამდენად იცნობს მას  ქალაქი, რამდენად სცემს საზოგადოება პატივს მას და მის ღირებულებებს. ფაქტობრივად, ყველაფერ ამაზეა აგებული თვითმმართველობის არჩევნები. მე არ მინდა სხვა პარტიის კანდიდატებს გული ვატკინო და ვიცი, რომ ვინც იქნებიან წარმოდგენილი  მერობის კანდიდატებად, ქალაქისთვის უცხო და მიუღებელი არავინ იქნება, თუმცა დაუშვათ,  პარიტეტულად თუ გადავანაწილებთ რეიტინგებს, ყველაზე ახლოს ერთმანეთან მაინც „ნაციონალური მოძრაობის“ და ქართული ოცნების“ კანდიდატები დგანან.  იმასაც ვიტყვი, რომ ბურთი მრგვალია და „მატჩი“ რა შედეგით დამთვრდება პროგნოზირება ძნელია. ყველაფერი ხალხზეა დამოკიდებული. რადიო „ათინათი“: როგორ ფიქრობთ რამდენად კარგად გიცნობთ მოსახლეობა? თეიმურაზ ბასილაია: მე ვფიქრობ ზუგდიდელები  ძალიან კარგად მიცნობენ. ძალიან ახალგაზრდა თაობაზე ორიენტაციას ალბათ ვერ ავიღებ, მაგრამ ჩემი ასაკის და უფროსი თაობის ხალხი კარგად მიცნობს. ჩემი მუშაობის მანძილზე, აბსოლუტურად, საზოგადოების ყველა ფენასთან მქონია ურთიერთობა, მათ შორის არასამთავრობო ორგანიზაციებთან, დევნილებთან, თვითმმართველობის ყველა რგოლთან. ზოგადად მე თვითონაც, არ ვარ ჩაკეტილი ადამიანი და მიყვარს ხალხთა ურთიერთობა. რადიო „ათინათი“:  მოსალოდნელია თუ არა მეორე ტური? თეიმურაზ ბასილაია:  ძალიან დიდი ალბათობით მოსალოდნელია მეორე ტური. ამის წინაპირობაა, ის რომ „ნაციონალური მოძრაობის“ და „ქართული ოცნების“ გარდა სხვა პარტიებსაც  ყავთ თავიანთი ამომრჩეველი და ვფიქრობ გარკვეულ პროცენტებსაც აიღებენ. რადიო „ათინათი“: რას პირდება თეიმურაზ ბაისლაია ზუგდიდელებს და როგორია თქვენი საარჩევნო პროგრამა? თეიმურაზ ბასილაია: არ მინდა წინასწარ გავახმოვანო ჩვენი საარჩევნო პროგრამა. 8 მაისს მივემგზავრებით თბილისში სადაც, იქნება პარტიის  ყრილობა და პროგრამის პრეზენტაცია. ერთი რამ შემიძლია გითხრათ, ზუგდიდში ძალიან ბევრი რამ არის გასაკეთებელი. მე ვარ იმ გუნდის წევრი, რომელმაც ძალიან დიდი ნახტომით შესძლო ჩვენი რეგიონი სრული წყვდიადიდან გამოეყვანა. დღეს გვაქვს ის ზუგდიდი, რომელსაც 2003 წლამდე და უფრო ადრე ვერც წარმოვიდგენდით. დღესაც უამრავი რამ არის გასაკეთებელი. მათ შორის, მოსაგვარებელია ბოტანიკური ბაღის პრობლემა, ქალაქის განახლება უნდა გაგრძელდეს, დასუფთავების სამსახური უფრო მოქნილად უნდა მუშაობდეს, გზების რეაბილიტაციაა საჭირო. უნდა გაგრძელდეს იმ პროექტებზე მუშაობა, რომელიც ჩვენი მთავრობის პერიოდში იყო დაგეგმილი. ჩემი გამარჯვების შემთხვევაში, ასევე, დიდი ყურადღება მიექცევა შშმ პირების პრობლემების მოგვარებას და მიუსაფართა სახლების მშენებლობას. რადიო „ათინათი“:  როგორ ფიქრობთ, მოახერხებს თუ არა „ნაცინალური მოძრაობა“ საზოგადოებაში ნდობის ხელახლა მოპოვებას, იმის გათვალისწინებით ,რაც საზოგადოებამ საპარლამენტო არჩევნებამდე ე.წ.  „ციხის კადრების“ სახით იხილა და ასევე იმის გათვალისწინებით, რომ დღესაც ყოფილი ხელისუფლების მაღალჩინოსნების მიმართ უამრავი ბრალდებები ისმის? თეიმურაზ ბასილაია: რითაც ხალხს აქამდე კვებავდნენ, ის დღეს უკვე აქტუალური აღარ არის, საზოგადოება ბევრ რამეში გაერკვა. არავისთვის არ არის დასამალი, რომ ჩვენს წინააღმდეგ დაგეგმილ ე.წ შავი პიარისვის მილიონები დაიხარჯა. კი ბატონო, „ნაციონალურ მოძრაობას“ ჰქონდა გადაცდომები და ამას  ჩვენ ვაღიარებთ. მაგრამ იმასაც ვხედავთ, რომ უამრავი სასამართლების ფონზე პიროვნებები ბევრ საქმეში გამართლდნენ ან ჯერჯერობით განაჩენი არ დამდგარა. სასჯელაღსრულების დაწესებულებებში არსებულ პრობლემებს დღესაც ვხედავთ, ბოლო ერთი წლის განმავლობაში ციხეებში გაურკვეველ ვითარებაში თერთმეტი ადამინი დაიღუპა. ფაქტობრივად ვხედავთ იმას, რომ ვითარების გამოსწორების ნაცვლად ხდება შეცდომების გამეორება გაორმაგებულად. რადიო „ათინათი“:  როგორ ფიქრობთ, რომ არა ე.წ „ციხის კადრები“ მოხდებოდა თუ არა ხელისუფლების ცვლილება? თეიმურაზ ბასილაია: „ციხის კადრები“ უბრალოდ შემაჯამებელი ეტაპი იყო, თორემ  ეს რეალობა უფრო ადრე შეიქმნა. თუნდაც ის გარემო, რომ დღეს სასულიერო პირები ხელისუფლებას მხარდაჭერას აყვედრებენ. „ქართულმა ოცნებამ“ სასულიერო პირები პოლიტიკურ ბრძოლაში ჩაითრია. ასევე ჩაითრია, არასამთავრობო ორგანიზაციები და მედია, რომელიც არჩევენების შემდეგ დაიხურა. ჩვენს წინააღმდეგ აგორებულ შავ პიარს გარკვეულ წილად ვუპირისპირდებოდით, თუმცა, გადამწყვეტი  მნიშვნელობა ფინანსურმა მხარემ იქონია. რადიო  „ათინათი“: როგორ შეაფასებდით წინასაარჩევნო გარემოს? თეიმურაზ ბასილაია: იმის გათვალისწინებით, რაც მოხდა ზუგდიდში ჩვენს ყრილობაზე, თეატრის წინ, რაც მოხდა ანაკლიაში, როდესაც ჩვენს მომხრეებს მძღოლები გადაყვანაზე უარს ეუბნებიან, ვერ ვიტყვი რომ სასტარტო პირობები ჯანსაღი იყო. საჭიროა, რომ ეს პროცესი დაიხვეწოს. მე აქედანვე მინდა მივმართო ჩემს ოპონენტებს,  თუ თენგიზ გუნავაზე, თეიმურაზ ბასილაიაზე ან ჩვენს, რომელიმე მაჟორიტარზე, თუნდაც ერთი ზეწოლის და ზოგადად ქალაქისთვის სამარცხვინო ფაქტი დაფიქსირდება მაშინ ჩავთვლი, რომ ეს ხელისუფლების დაკვეთით მოხდა. რადიო „ათინათი“:  „ნაციონალური მოძრაობის“ პერიოდშიც ხდებოდა მსგავსი ფაქტები... თეიმურაზ ბასილაია: მე არ ვამბობ, რომ არ ხდებოდა, მე ვამბობ, რომ  ნუ გააკეთებენ იმის დუბლირებას გაორმაგებულად და გაათმაგებულად. ხელისუფლება ამის გამოსწორებას არ ცდილობს. რადიო „ათინათი“: კოჰაბიტაცია გრძელდება? თეიმურაზ ბასლაია: ჯერჯერობით კოჰაბიტაცია იმ მოცემულობაშია, რაც გვქონდა ჩვენ ზუგდიდში საპარლამენტო არჩევნებიდან დღემდე. ამ არჩევნების შემდეგ, თუნდაც, ყველა ტერიტორიულ ორგანოში უმრავლესობით ჩვენ მოვედით, ამ შემთხვევაშიც მოგვიწევს ხელისუფლებასთან კოჰაბიტაციის რეჟიმში მუშაობა.  ჩემი აზრით, კოჰაბიტაცია სულაც არ არის მანკიერი მცნება. უნდა მივეჩვიოთ სხვადასხვა პოლიტიკურ რგოლთან თანამშრომლბას. დროა, ჩვეს ქალაქში ცირკებისა და სანახაოებების ეპოქა დასრულდეს.