საარჩევნო ბლოკ “არასაპარლამენტო ოპოზიცია- ჩიხრაძე,კუკავას“ ზუგდიდის მერობის კანდიდატად სამოქალაქო მოძრაობა „სამეგრელოს ხმის“ წევრი ირაკლი ღურწკაია დასახელდა. ღურწკაიას კანდიდატურა სამოქალაქო მოძრაობა „სამეგრელოს ხმის“ ლიდერმა თენგიზ ჯგუშიამ  წარადგინა. ღურწკაიას  განცხადებით,იგი თავის გუნდთან ერთად იბრძოლებს გამარჯვებისთვის და არ დაუშვებს ზუგდიდის თვითმმართველობაში კლანური მმართველობა მოვიდეს. „უკვე რამდენიმე წელია ხელისუფლებაში ისეთი ადამიანები არიან, რომლებიც მხოლოდ თავიანთი ფინანსური ინტერესების დასაკმაყოფილებლად  მოდიან. ზუგდიდი იმსახურებს ისეთ თვითმმართველობის წარმომადგენლებს, რომლებიც ხალხის კეთილდღეობისთვის თავს  გასწირავენ."- აცხდებს ღურწკაია. ირაკლი ღურწკაია, გამარჯვების შემთხვევაში ზუგდიდის მუნიციპალიტეტის ქონების ოპტიმიზაციას გეგმავს  და აცხადებს, რომ მუნიციპალურ საკუთრებაში არსებულ ძვირადღირებულ ავტოსატრანსპორტო საშუალებებს აუქციონზე გაყიდის. „მანქანების გაყიდვიდან მიღებული თანხა სოციალურ სფეროში გადანაწილდება. ქალაქის ბიუჯეტიდან სოცილურ სფეროზე ძლიან მცირე თანხებია მიმართული.მიმაჩინა,რომ ზუგდიდის მერს და მის მოადგილეებს  არ სჭირდებათ ძვირადღირებული "პრადოები".გადასაწყვეტია,ასევე პრემიების გაცემის საკითხი“, - ამბობს ირაკლი ღურწკაია. ამასთან, საარჩევნო ბლოკ “არასაპარლამენტო ოპოზიცია - კუკავა, ჩიხრაძეს“ ზუგდიდის მერობის კანდიდატი თვლის, რომ ქალაქის განვითარებისთვის საჭიროა: ინვესტიციების მოზიდვა, საკუთრების უფლებების დაცვა, და ასევე, მცირე და საშუალო ბიზნესის განვითარება და ხელშეწყობა. ცნობისთვის,  “არასაპარლამენტო ოპოზიცია - კუკავა, ჩიხრაძეს“ საარჩევნო შტაბს ზუგდიდში თენგიზ ჯგუშია უხელმძღვანელებს.