ფაშიზმზე გამარჯვების 69-ე წლისთავის აღნიშვნა ზუგდიდში დილიდან მიმდინარეობს. ზუგდიდის მუნიციპალიტეტის გამგეობისა და სამეგრელო-ზემო სვანეთის წარმომადგენლებმა ომის ვეტერანები გამგეობის შენობაში მიიღეს, სადაც სამახსოვრო ფოტოები გადაიღეს. მოგვიანებით, ზუგდიდის ვლაქერნის ღვთისმშობლის სახელობის ტაძარში მეუფე გერასიმემ მეორე მსოფლიო ომის დროს დაღუპული გმირების სულის მოსახსენიებელი პანაშვიდი გადაიხადა. ამასთან, თვითმმართველობის წარმომადგენლებმა და ომის ვეტერანებმა მაცხოვრის კარისა და ქალაქის სასაფლაოზე დაკრძალული ომის ვეტერანების საფლავები გვირგვინებით შეამკეს. ერთჯერადი დახმარების სახით ომის ვეტერანებს პირად ანგარიშზე 600-600 ლარი ჩაერიცხათ, აქედან 200 ლარი ადგილობრივი ბიუჯეტიდან, ხოლო 400 ლარი- ცენტრალური ბიუჯეტიდან გამოიყო. ცნობისთვის, ზუგდიდის მუნიციპალიტეტში სულ 31 ომის მონაწილეა რეგისტრირებული, აქედან 13 დევნილია. დღევანდელ ღონისძებაზე მხოლოდ 7 მათგანმა შეძლო მოსვლა.