საქართველოს პრემიერ-მინისტრის ირაკლი ღარიბაშვილის განცხადებით, მისი ინიციატივით, იწყება სახელმწიფო პროგრამის  - „აწარმოე საქართველოში“ ამოქმედება. „სწორედ აქ, სამეგრელოში დღეს მინდა დავაანონსო ის პროგრამა, რომლის პრეზენტაციაც ხვალ თბილისში გაიმართება. ჩემი ინიციატივით იწყება სახელმწიფო პროგრამა - ,,აწარმოე საქართველოში“. ეს გულისხმობს ყველა რეგიონში, შემდეგ ყველა რაიონსა და ბოლოს ყველა სოფელში ტრადიციული ქართული წარმოების აღდგენას და აღორძინებას. ჩვენ უნდა ვაწარმოოთ ისეთი პროდუქცია, რომლის შემოტანის აუცილებლობაც არ გვაქვს. ეს, რა თქმა უნდა, გააჩენს სამუშაო ადგილებს და ხალხი დასაქმდება. ჩვენ გვექნება უმაღლესი ხარისხის ქართული პროდუქცია, რომელიც კონკურენციას გაუწევს უცხოურს და ყველასთვის საამაყო იქნება. ეს არის ჩემი ოცნება და ჩვენ ამას შევძლებთ!“, განაცხადა ზუგდიდში ყოფინისას  პრემიერმა ირაკლი ღარიბაშვილმა. შეგახსენებთ, რომ  საქართველოს პრემიერი ირაკლი ღარიბაშვილი დღეს ზუგდიდში იმყოფებოდა. მან „ქართული ოცნების“ გამგებლობის კანდიდატები, სამეგრელო-ზემო სვანეთის მასშტაბით  წარადგინა.