სოხუმის დე ფაქტო ლიდერი ალექსანდრე ანქვაბი აფხაზური ტელევიზიისათვის მიცემულ ინტერვიუში აცხადებს, რომ ის არსად წასულა, აფხაზეთშია და ყველაფერს აკეთებს ვითარების სტაბილიზაციისთვის. მისი თქმით,მიტინგის მსვლელობისას ე.წ. რთული ფაზის შემდეგ მასთან ადმინისტრაციაში ოპოზიციური საბჭოს, ფაქტობროვად ყველა კოორდინატორი -რაულ ხაჯიბმა, ახრა ბჟანია და სხვები მივიდნენ და კატეგორიულად ითხოვდნენ მის გადადგომას. „ვაწარმოებდით მოლაპარაკებებს თუ როგორ მოგვეხდინა შექმნილი დაძაბული მდგომარეობის განმუხტვა. მათი მხრიდან იყო კატეგორიული მოთხოვნები ჩემი გადადგომის შესახებ. განხილვები პერიოდულად წყდებოდა ხან მათი, ხანაც ჩვენი თხოვნით და როდესაც მათ ჩვენ კიდევ ერთხელ ვთხოვეთ გარკვეული საკითხების განხილვა დახურულ კარს მიღმა მოგვეხდინა, ისინი ხისტად გატრიალდნენ და ქვემოთ, თავიანთ მომხრეებთან ჩავიდნენ. ამის შემდეგ ფაქტობრივად შენობის შტურმი დაიწყო. მათ გაეწიათ წინააღმდეგობა. მე არსად წავსულვარ. აფხაზეთში ვარ. უშიშროების საბჭოს წევრებთან ერთად მოვლენათა განვითარების სხვა და სხვა ვარიანტს განვიხილავთ",_ აცხადებს ანქვაბი და აღნიშნავს, რომ ადამიანების დიდი ჯგუფი, შეიარაღებულები აფხაზეთის ტელევიზიის შენობაშიც შეიჭრა და ფაქტობრივად აიღო იგი. „იურიდიულად მომხდარი სახელმწიფო გადატრიალებაა და სხვა არაფერი",- აცხადებს ანქვაბი. მისივე თქმით, ამჟამად უშიშროების საბჭოს წევრები მუშაობას აგრძელებენ, ხოლო ძალოვნები აკეთებენ ყველაფერს იმისათვის, რათა სიტუაცია სტაბილურობის ნიშნულს მიუახლოვდეს. ყველაფერს გავაკეთებთ იმისათვის, რომ მოვლენები კანონიერების ფარგლებში განვითარდეს.სხვა გზა უბრალოდ ჩვენ არ გვაქვს",_ განაცხადა ანქვაბმა. Lifenews.ru -თვის მიცემულ ინტერვიუში, ცნობილი აფხაზი ბლოგერი როინ აგრბა ამბობს, რომ ალექსანდრე ანქვბი არ გდამდგარა, თუმცა სოხუმი უკვე დატოვა. მისი თქმით, ჯერჯერობით უცნობია, თუ რომელ ქალაქში იმყოფება დე-ფაქტო ლიდერი. ბლოგერის განმარტებით, მსგავსი მიტიბგის მიზეზები კორუპციაში იმალება, რომელშიც ქვეყანა უკვე „ჩაეფლო“. – შენობის შტურმით აღებისკენ არანაირი მოწოდებები არ ყოფილა, ყველაფერი მშვიდად მიმდინარეობდა. როგოც ჩანს, შეკრებილებს „ყველაფერი ერთად დაუგროვდათ „ და პრეზიდენტთან მოლაპარაკების მორიგი მცდელობის შემდეგ, თავი ვერ შეიკავეს, - აღნიშნა როინ აგრბმ - პოლიციას არანაირი სპეცსაშუალებები არ გამოუყენებია. შენობაში სპეცდანიშნულების რაზმი იმყოფებოდა, თუმცა, ზოგიერთმა მაინც მოახერხა პრეზიდენტის კაბინეტში შეჭრა. შეგახსენებთ, რომ აფხაზეთში მოქმედმა ოპოზიციამ ე.წ მთავრობის სახლი დაიკავა და ალექსანდრე ანქვაბის, მისი ე.წ. მთავრობის, ე.წ. გენერალური პროკურორის და აფხაზეთის აღმოსავლეთ რაიონების ხელმძღვანელების გადადგომა მოითხოვა.