თავდაცვის სამინისტროს დაზვერვის ოფიცრის, პაატა ქარდავას ოჯახის წევრებმა „ნაციონალური მოძრაობის საარჩევნო შტაბთან” გამართული  საპროტესტო აქციის შემდეგ გუბერნიის შენობასთან გადაინაცვლეს და სამეგრელო-ზემო სვანეთის გუბერნატორ ლევან შონიასთან შეხვედრა მოითხოვეს. გუბერნატორსა და გარდაცვლილის ახლობლებს შორის შეხვედრა დახურულ კარს მიღმა შედგა. შეხვედრის შემდეგ  პაატა ქარდავას  ქალიშვილმა ქრისტინა ქარდავამ ჟურნალისტებს განუცხადა, რომ  ლევან შონია მის ოჯახს გამოძიების მსვლელობისას  მხარში ედგა. „დღეს დახმარების თხოვნით მოვედი,  დამეხმაროს, რომ დავსაჯო მამაჩემის მკვლელები- რომან შამათავა, თენგიზ გუნავა,  კობა ნარსია და ზაზა გოროზია", - ამბობს ქრისტინა ქარდავა. შეგახსენებთ, რომ მანამდე გარდაცვლილის ოჯახის წევრებს „ნაციონალების“ საარჩევნო შტაბთან სამეგრელო-ზემო სვანეთის სამმართველოს ყოფილი უფროსი თენგიზ გუნავა და საარჩევნო შტაბის ხელმძღვანელი ლაშა დამენია შეხვდნენ. თენგიზ გუნავამ ქარდავას ოჯახის წევრებს განუცხადა, რომ მას პაატა ქარდავას საქმესთან კავშირი არ აქვს და ხელისუფლება მათ წინასაარჩევნოდ იყენებს.