„სამეგრელოს ხმის“ ლიდერმა თენგიზ ჯგუშიამ და "არასაპარლამენტო ოპოზიციიდან" ზუგდიდის მერობის კანდიდატმა ირაკლი ღურწკაიამ, თანამოაზრეებთან ერთად, ზუგდიდის გამგეობის წინ საპროტესტო აქცია გამართეს. მათ  „ზუგდიდდასუფთავების“ სამსახური უმოქმედობაში დაადანაშაულეს და ქალაქის დასუფთავება მოითხოვეს. „ზუგდიდი ნაგავში იხრჩობა“. „უსაქმურები ნაგავსაყრელში“, „ქალაქი ეპიდემიის საფრთხის წინაშე“ - ასეთი ტრანსპარანტები ეკავათ აქციის მონაწილეებს. საპროტესტო აქციის მსვლელობისას, რამდენიმე მოქალაქესა და აქციის ორგანიზატორებს შორის მცირე ინციდენტი მოხდა. მოქალაქეებმა აქციას „უსამართლო მოთხოვნა“ უწოდეს და ორგანიზატორებს თავშეკავებისკენ მოუწოდეს. ზუგდიდის მუნიციპალიტეტის გამგეობის „ზუგდიდდასუფთავების“ სამსახურში „არასაპარლამენტო ოპოზიციის“ წარმომადგენლების ბრალდებებს არ იზიარებენ და აცხადებენ, რომ ისინი ქალაქს ყოველდღე ასუფთავებენ.