„სამეგრელოს ხმის“ ლიდერმა და “არასაპარლამენტო ოპოზიციის“ ზუგდიდის შტაბის ხელმძღვანელმა თენგიზ ჯგუშიამ დღეს გამართულ საგანგებო ბრიფინგზე განაცხადა, რომ მას  „ქართული ოცნების“ ადგილობრივი შტაბის აქტივისტები და მხარდამჭერები ფიზიკური განადგურებით ემუქრებიან. ამასთან, ჯგუშია ამბობს, რომ მის წინააღმდეგ ბრძოლას სამეგრელო-ზემო სვანეთის გუბერნატორი ხელმძღვალეობს. თენგიზ ჯგუშიამ ბრიფინგზე  ჟურნალისტებს სატელეფონო ჩანაწერი წარუდგინა, სადაც მისივე განმარტებით, „ქართული ოცნების“ ერთ-ერთი აქტივისტი ვინმე სოფო წითლიძე ემუქრება. ჩანაწერში ისმის ქალის ხმა, რომელიც ჯგუშიას ყელის გამოფატვრით ემუქრება. როგორც „სამეგრელოს ხმის“ ხელმძღვანელები განმარტავენ, ზემოაღნიშნული პიროვნება რამდენიმე თვის წინ მათთან თანამშრომლობდა, თუმცა, მოგვიანებით ის მმართველი პარტიის აქტივისტი გახდა. „სამეგრელოს ხმის“ ლიდერი და მისი გუნდის წევრები სამეგრელო-ზემო სვანეთის პოლიციის მთავარი სამმართველოს უფროს გრიგოლ ბესელიასგან საქმის აღძვრას მოითხოვენ. „ბატონო გრიგოლ, სასწრაფოდ აღძარით სისხლის სამართლის საქმე, თორემ პირდაპირ თქვენ, როგორც ირაკლი გოგოხიას ნათლიის შვილს და გოგოხიას მთავარ ლობისტ შონიასთან ერთად , დაგადანაშაულოებთ ამ სქემის ორგანიზატორობაში“, -ამბობს თენგიზ ჯგუშია. სამეგრელო ზემო-სვანეთის გუბერნატორი ლევან შონია ჯგუშიას ბრალდებაზე კომენტარს არ აკეთებს. „ქართული ოცნების“ აქტივისტი სოფო წითლიძე თენგიზ ჯგუშიასთან დარეკვისა და მუქარის ფაქტს უარყოფს და ამბობს, რომ ჯგუშია არის ფსიქოლოგიურად გაუწონასწორებელი ადამიანი, რომელიც ყურადღების მიქცევას ამგვარი განცხადებებით ცდილობს.