დღეს, "ერთიანი ნაციონალური მოძრაობის" წარმომადგენლები და მხარდამჭერები სოფელ დარჩელსა და კორცხელში შეიკრიბნენ. შეხვედრას ამომრჩევლებთან, "ნაციონალური მოძრაობის" ლიდერი გიორგი ვაშაძე ესწრებოდა. მისი თქმით,წინასაარჩევნო კამპანიის ფარგლებში, სამეგრელოში ჩამოსვლა ბოლო დღისთვის დაგეგმა, "ბოლოსკენ შემოვინახე სამეგრელო, რადგანაც ყველაზე მაგარი მუხტი აქ არის და რა თქმა უნდა გამარჯვებას აქედან დავიწყებთ". ვაშაძემ ამომრჩევლებს ზუგდიდის რაიონის გამგებლობის კანდიდატად, თენგიზ გუნავა და საკრებულოს თავმჯდომარეობის კანდიდატად, გელა თოლორაია წარუდგინა. ვაშაძის განმარტებით, ხელისუფლების მხრიდან ყველგან და ყველა მიმართულებით ჩანს უმოქმედობა და უუნარობა, "ხელისუფლება, რომელიც ძალადობაზე და შურისძიებაზე ცდილობს დაამყაროს საარჩევნო კამპანია, ის ხელისუფლება განწირულია". სოფლებში შეხვედრას დაახლოებით, 300-მდე ადამიანი ესწრებოდა.