„სამეგრელოს ხმის“ ლიდერმა და „არასაპარლამენტო ოპოზიციის“ საარჩევნო შტაბის ხელმძღვანელმა თენგიზ ჯგუშიამ, შტაბის წევრებთან ერთად,  სამეგრელო-ზემო სვანეთის სამხარეო პოლიციასთან საპროტესტო აქცია გამართა. მან პოლიციის უფროსი გია ბესელია „ქართული ოცნების“ მფარველობაში დაადანაშაულა. „საარჩევნო ტემპერატურა „ოცნების“ მხრიდან ძალიან მაღლა იწევს, აყალბებენ არჩევნებს და პირადად შენ ბესელია, ხელს უწყობ ამ ყველაფერს. შენ იყავი ცნობილი ზონდერი „ნაციონალების“ და იგივეს აკეთებ დღეს „ოცნების“ სახელით“, - მიმართა ჯგუშიამ პოლიციის უფროსს, გრიგოლ ბესელიას მეგაფონის საშუალებით, რომელთანაც შეხვედრას უშედეგოდ ითხოვდა. თენგიზ ჯგუშიას სამმართველოს წარმომადგენელბი შეხვდნენ და განუცხადეს, რომ ნებისმიერი სახის დარღვევა, რომელიც დაფიქსირდება რეაგირების გარეშე არ დარჩებოდა. ამასთან, მათ ჯგუშიას განუმარტეს, რომ თუ ის დარღვევაზე რაიმე სახის ინფორმაციას ფლობდა სამართალდამცავი ორგანოებისთვის წერილობით მიეწოდებინა. მანამდე, თენგიზ ჯგუშიამ „არასაპარლამენტო ოპოზიციის“ საარჩევნო შტაბში საგანგებო ბრიფინგი გამართა, სადაც ზუგდიდში მოსალოდნელ არეულობაზე და შეტაკებებზე ისაუბრა. ჯგუშიას განმარტებით, მათ #30 საარჩევნო უბანზე „ქართული ოცნების“ 50 კაციანი ჯგუფი, დააფიქსირეს, რომელსაც ვინმე გრიხა მიქავა ხელმძღვანელობდა. „ზუგდიდში “ოცნების“ ზონდერები სისხლისმღვრელი შეტაკებების საფუძველს ქმნიან. ამ ჯგუფს ვიმე გრიხა მიქავა ხელმძღვანელობს, რომელიც თავის დროზე როლანდ ახალიასთან ასრულებდა იგივე დავალებებს. მოვარდნენ #30 საარჩევნო უბანზე, სადაც ჩვენ, „ოცნების“ წარმომადგენლის მიერ უკანონოდ კამერის შეტანასთან დაკავშირებით, ვიყავით მისულები და მაპროვოცირებელ და მუქარის ტონით ჩვენს წარმომადგნლებს მოუწოდებდნენ არ ევლოთ საარჩევნო უბნებზე. მე თენგიზ ჯგუშიამ სულ ცოტა ხნის წინ ასობით ადამიანი გადავარჩინე  სისხლისმღვრელ შეტაკებას“, - განაცხადა თენგიზ ჯგუშიამ ბრიფინგზე. „ქართული ოცნების“ საარჩევნო შტაბში თენგიზ ჯგუშიას ბრალდებებს აბსურდულს უწოდებენ და ვრცელი კომენტარის გაკეთებას მიზანშეწონილად არ მიიჩნევევნ.