ზუგდიდის მუნიციპალიტეტის საკრებულოში ფრაქცია „ქრისტიან-კონსერვატიული პარტია“ შეიქმნა. ახლადშექმნილ ფრაქციას დეპუტატი კახა ჩანგელია უხელმძღვანელებს. „ქრისტიან-კონსერვატიული პარტია“ საარჩევნო ბლოკ „ერთიანი ნაციონალურ მოძრაობასთან“ იყო გაერთიანებული. აღსანიშნავია, რომ აღნიშნულმა ფრაქციამ წინა საკრებულოს სხდომებზეც განაცხადა ფრაქციის შექმნის შესახებ, თუმცა, არასრული დოკუმენტაციის გამო დაფუძნებაზე უარი ეთქვა. „დოკუმენტებთან დაკავშირებით იყო შეცდომები, რომელიც გასწორდა და შესაბამისად ფრაქცია დაფუძნდა“, - თქვა კახა ჩანგელიამ. ზუგდიდის საკრებულოში ამ დრომდე 5 ფრაქცია -„ქართული ოცნება – თავისუფალი დემოკრატები“, „ქართული ოცნება-დემოკრატიული საქართველო“, „ქართული ოცნება – რესპუბლიკელები” , „ერთიანი ნაციონალური მოძრაობა” და „ქრისტიან-კონსერვატიული პარტია“ შეიქმნა.