ქალაქ ზუგდიდის საკრებულოს დეპუტატმა „ერთიანი ნაციონალური მოძრაობიდან“ ანა წითლიძემ დღეს გამართულ საკრებულოს სხდომაზე საგანგებო განცხადება გააკეთა. მან „ქართული ოცნების“ წარმომადგენლებს მიმართა და თვითმმართველობის ორგანოებში მიმდინარე საკადრო ცვლილებები გააკრიტიკა. „ჩვენი მონაცემებით, „ნაციონალური მოძრაობის“ პერიოდში, თუ ადგილობრივი თვითმმართველობის ორგანოებში 55% ინიშნებოდა პარტიული ნიშნით, დღევანდელი სტატისტიკური მონაცემებით, მე მაქვს ეს მონაცემები, როგორც მერიის,  ასევე საკრებულოს და გამგეობის 90 პროცენტი, უკვე დანიშნული საჯარო მოხელეების მოვალეობის შემსრულებლები, „ქართული ოცნების“პარტიული აქტივისტები არიან. განსაკუთრებით, ყურადღება მინდა გავამახვილო რამდენიმე ადამიანზე. ეს ის ადამიანები არიან, რომლებიც "ნაციონალური მოძრაობის" განსაკუთრებული კრიტიკით გამოირჩეოდნენ, ძალიან ხშირად სამართლიანად და ორმაგად, ხშირად - უსამართლოდაც. სწორედ ეს გვაძლევდა ჩვენ იმის საფუძველს გვეფიქრა, რომ ისინი თავიანთ საქმიანობაში იყვნენ არაობიექტურები. "მაესტროს" ჟურნალისტი ნანა ფაჟავა, რომელიც დაინიშნა გუბერნიის ადმინისტრაციის პრესსამსახურის უფროსად, "პირველი არხის" ჟურნალისტი ირაკლი ლაგვილავა, რომელიც საკრებულოში ანალოგიურ თანამდებობაზე, დროებით მოვალეობის შემსრულებლად, დაინიშნა და „საერთაშორისო გამჭვირვალობა - საქართველოს“ თანამშრომელი მალხაზ ჭკადუა, რომელიც მთავრობის კანცელარიაში მედიის განხრით მუშაობს. აღსანიშნავია, რომ ეს ადამიანები დაინიშნენ აბსოლუტურად უკონკურსოდ. ჩვენ პიროვნულად შეიძლება არც ერთ მათგანთან არ გვაქვს არაფერი საწინააღმდეგო, მაგრამ მე ნამდვილად ვისურვებდი, რომ ჩემს ქვეყანაში, ჩემს ქალაქში დასრულებულიყოს ფსევდო - ჟურნალისტების და ფსევდო - არასამთავრობოების დრო და საჯარო სამსახურებში ნამდვილად მოსულიყვნენ ის ადამიანები, რომლებიც შეირჩევიან თავიანთი პროფესიონალიზმით. ამ შემთხვევაში, შეიძლება ამ ადამიანების პროფესიონალიზმთან მიმართებაში პრეტენზია არ გვქონდეს, მაგრამ ამ ხნის განმავლობაში მათი მომზადებული სიუჟეტები და სტატიები უკვე კარგავს ობიექტურობას“, - თქვა საკრებულოს სხდომაზე ანა წითლიძემ. საზოგადოებრივი არხის ყოფილი ჟურნალისტი ირაკლი ლაგვილავა ჟურნალისტებთან საუბარში აღნიშნავს, რომ ის ამ დროისთვის არც ერთ თანამდებობაზე არ არის დანიშნული. „სამწუხაროა,რომ საკრებულოს, თუნდაც საზოგადოების საკმაოდ მცირე ნაწილის ნდობაგამოცხადებული წევრი ავრცელებს ცრუ ინფორმაციას. მე არ გამოვრიცხავ, რომ ამ თანამდებობაზე დავინიშნო, მაგრამ დღეს არსებული სიტუაციით, არც ერთ თანამდებობაზე არ ვარ დანიშნული. რაც მთავარია, მე მინდა ვიცხოვრო ისეთ ქვეყანაში, სადაც საჯარო სამსახური არ იქნება რომელიმე პარტიის მსახურება.  თუ კი მე ვიქნები საჯარო სამსახურში, ვიქნები ხალხის და არა რომელიმე პარტიის მსახური“, - ამბობს ირაკლი ლაგვილავა. სამეგრელო-ზემო სვანეთის გუბერნატორის ადმინისტრაციის პრესასთან ურთიერთობის სამსახურის უფროსი ნანა ფაჟავა ჟურნალისტებთან სატელეფონო საუბარში აცხადებს, რომ ის ანა წითლიძის განცხადებებზე კომენტარს არ აკეთებს. ანა წითლიძის განცხადება ასევე უკომენტაროდ დატოვა "საერთაშორისო გამჭვირვალობა - საქართველოს" ყოფილმა თანამშრომელმა მალხაზ ჭკადუამ.