აღნიშნულზე განცხადება საკრებულოს წევრმა „ნაციონალური მოძრაობიდან“- ანა წითლიძემ, დღეს გამართულ საკრებულოს სხდომაზე გააკეთა. მისი თქმით, ამ ფესტივალის ერთ-ერთი ორგანიზატორი იყო დავით კოდუა და სწორედ ის აკეთებდა განცხადებებს 35-40 ათასამდე ტურისტის ჩამოსვლის შესახებ. „არავინ არ მიდის ამ გაუბედურებულ ხალხთან და არ ეუბნება რა მოხდა რეალურად. გამობრძანდეს ბატონი კოდუა და ისაუბროს, რა მოხდა რეალურად, საიდან გათვალა მან 35-40 ათასი ტურისტი და რატომ ჩამოვიდა 5 ათასი. სხვა შემთხვევაში ჩვენ გუბერნატორისგან ვითხოვთ დადგეს მისი პასუხისმგებლობის საკითხი და ის გადაყენებულ იქნას დაკავებული თანამდებობიდან“, - ამბობს ანა წითლიძე. სამეგრელო-ზემო სვანეთის სამხარეო ადმინისტრაციის რეგიონული პროექტების კოორდინირების სამსახურის უფროსი დავით კოდუა აცხადებს, რომ ის პროექტის ორგანიზატორი არ ყოფილა და ფესტივალს მხოლოდ კოორდინირებას უწევდა. მისივე განმარტებით, 35-40 ათასი ტურისტის ჩამოსვლის შესახებ პირობითად იყო გაცხადებული ტურიზმის ადმინისტრაციის და ფესტივალის მენეჯერების მიერ. „მე არ ვარ ექსპერტი, რომ ანალიზი გავაკეთო და უარყოფით შედეგებზე ვისაუბრო. რაც შეეხება ფაქტორებს, თუ რატომ არ მოხდა ტურისტების შემოდინება, შემიძლია ჩემი სუბიექტური აზრი გითხრათ - ანაკლია მივიღეთ როგორც იბიცა და მონაკო. ეს რის გამოც იყო გამოწვეული, ყველამ ვიცით. ჩვენ არ შეგვეძლო ფასწარმოებაში ჩარევა, ეს არ არის კუბა და ჩრდილოეთ კორეა. ეს არის საბაზრო ეკონომიკის ქვეყანა, სადაც ფასწაროებას ალაგებს კონკურენცია“, - თქვა დავით კოდუამ. ამასთან, დავით კოდუამ წითლიძეს ინტრიგანი უწოდა და თქვა, რომ მას გარკვეული ჯგუფები ლობირებენ და აქვს ინფორმაცია, თუ ვისი დაფინანსებით და როგორ იღებდა ის განათლებას ევროპაში. ზუგდიდის საკრებულოს წევრმა ანა წითლიძემ დავით კოდუას ამ განცხადებას იმ პირობით უპასუხა, თუ გამოცემა მის კომენტარს უცვლელად გამოაქვეყნებდა. „დათო კოდუა ნამდვილად არ არის ის პოლიტიკური ფიგურა რომ განსაკუთრებული ინტერესის საგანს წარმოადგენდეს ჩვენთვის, ის ერთი რიგითი საჯარო მოხელეა მხოლოდ, რომელსაც ეკისრება პასუხისმგებლობა, როგორც კაზანტიპის კოორდინატორს რეგიონში. პროექტისა, რომელიც ჩავარდა და რომელმაც მოსახლეობას ვალები დაადო. სხვანაირად კოდუა არასაინტერესო ტიპაჟია. რაც შეეხება ჩემს დაფინანსებას, მე აქედან ვეუბნები ბატონ კოდუას :ბატონი კოდუასგან განსხვავებით, მე არასოდეს მიცხოვრია მამიკოს ფულებით, არასოდეს ჩამიწყვია მამიკოს ფულებით გამოცდები, არასოდეს დავუნიშნივართ მამიკოს რეკომენდაციით და ჩაწყობით იმ თანამდებობაზე, რომელზედაც ახლა თვითონ მუშაობს და სადაც მამიკოს ჩაწყობით ისე შეტენეს, რომ გუბერნატორს მისი დანიშვნა არ უნდოდა. მე ვეთანხმები: მე 2007 წელს მოვხვდი 10 საუკეთესო რეგიონალურ სტუდენტს შორის და წინა ხელისუფლებამ 2 სამაგისტრო კურსზე სწავლა დამიფინანსა საზღვარგარეთ. ბ-ნ კოდუასან განსხვავებით, მე დღეს დოქტორანტურაზე სწავლას სახელმწიფო მაფინანსებს. ბოლო ორი წელი - ის ხელისუფლება რომელსაც თვითონ წარმოადგენს“, - ამბობს ანი წითლიძე.