ეგრისის ქედის,იგივე სამეგრელოს ქედის ეროვნულ პარკად გამოცხადების შესახებ ხელმოწერების შეგროვება დაიწყო. პეტიცია დღეს გამოქვეყნდა და მას უკვე 70-ზე მეტი ხელმომწერი ჰყავს.იდეა საქართველოს სპელეოკავშირის წევრ რომან თოლორდავას ეკუთვნის. რომან თოლორდავას თქმით,სამეგრელოს მთიანეთის ეროვნულ პარკად გამოცხადების იდეა ჯერ კიდევ 1998 წელს გაუჩნდათ,თუმცა საკითხი დღემდე ღიად რჩება. თოლორდავა ეგრისის ქედის დაცულ ტერიტორიად გამოცხადების აუცილებლობაზე საუბრობს და აცხადებს, რომ ტერიტორიის დაბინძურების გამო, ქედზე მდგომარეობა საგანგაშოა. „იქ არსებულმა სიბინძურემ უკვე ყოველგვარ ზღვარს გადააჭარბა.ყოველ ნაბიჯზე ძალიან დიდი რაოდენობის ნაგავია. „ტობა ფესტივალის“ ფარგლებში ნაგავი 10 ცხენით ჩამოვიტანეთ, მაგრამ ეს ერთჯერადი ხასიათის იყო და ამით საქმე ვერ მოგვარდება.ყველაზე დიდ პრობლემას ის ქმნის,რომ ქილებს პირდაპირ ტბებში ყრიან და იქიდან მისი ამოტანა ძალიან ძნელია.მდგომარეობა საგანგაშოა და ასე თუ გაგრძელდა ამ ტერიტორიას დავღუპავთ,დავკარგავთ“, - თქვა რადიო „ათინათთან“ საუბარში რომან თოლორდავამ. ამასთან, თოლორდავა აცხადებს, რომ ზემოაღნიშნული საკითხით დაცული ტერიტორიების სააგენტოც დაინტერესებულია და იმედს გამოთქვამს,რომ სამეგრელოს მთიანეთის ეროვნულ პარკად გამოცხადების შესახებ გადაწყვეტილება უახლოეს მომავალში იქნება მიღებული.