110 კვ მაღალი ძაბვის გადამცემი ხაზი „ნიგვზიანი“ ექსპლუატაციაში გაეშვა. ენერგო–პრო ჯორჯია 12 კმ სატრანზიტო ხაზის მშენებლობას რამდენიმე თვე აწარმოებდა, ხოლო ტექნიკურ დეტალებზე სამუშაოს დასრულების შემდეგ, ხაზი ექსპლუატაციაში საბოლოოდ შევიდა. ხაზი „ნიგვზიანი“ სტრატეგიული მნიშვნელობისაა, რადგან ის ელექტროენერგიის მიწოდების სტაბილურობის გარდა, იძლევა მეტი სიმძლავრეების გატარების შესაძლებლობას. ახალი ხაზის მშენებლობის პროექტის ღირებულება 3,5 მლნ ლარია. ხაზი „ნიგვზიანი“ ელექტროენერგიას აწვდის ფოთისა და ურეკის ზონას. დღემდე აღნიშნულ რაიონებს ელექტროენერგია მიეწოდებოდა 110 კვ ხაზი „ჭალადიდის“ მეშვეობით; ხოლო „ნიგვზიანის“ ექსპლუატაციაში გაშვებით, აღნიშნულ რაიონებს სიმძლავრის მიწოდების თვალსაზრისით გაუჩნდათ კვების მეორე წყარო; რაც ელექტროენერგიის უწყვეტი და სტაბილური მომარაგების გარანტიაა. ნიგვზიანის ექსპლუატაციაში შესვლით, ურეკისა და ფოთის ზონის ელექტროენერგიის მიწოდების სტაბილურობა მნიშვნელოვნად გაიზარდა. რაც ნიშნავს იმას, რომ 110 კვ ქსელში კომპანიის მიერ განხორციელებული გეგმიური და ავარიული გათიშვების შემთხვევაშიც კი, აღნიშნულ რაიონებში ელექტროენერგიის მიწოდება ფაქტიურად არ შეფერხდება. გარდა ამისა, ავარიული რეჟიმის შემთხვევაში, ახალი ხაზით შესაძლებელი იქნება ძაბვის მიწოდება ლანჩხუთის, ოზურგეთის, ჩოხატაურის, ქობულეთის, სამტრედიის, ხონის და ბათუმის ნაწილისთვის.