„სამეგრელოს ხმის“ ლიდერი თენგიზ ჯგუშია ახალ სახალხო მოძრაობას - „მოითხოვე და შეასრულე დანაპირები“ იწყებს. მისი განმარტებით, მოძრაობის მიზანია ხელისუფლებას შეახსენოს წინასაარჩევნო დაპირებები და  მოსთხოვოს მათი შესრულება. ამასთან, ჯგუშია ამბობს, რომ დანაპირების შესრულების მოთხოვნა მოსახლეობამაც უნდა ისწავლოს. ჯგუშიამ ახალი მოძრაობა თანამოაზრეებთან ერთად,  კომბინატში კომპაქტურად ჩასახლებულ  დევნილებთან შეხვედრით დაიწყო. „შეასრულებს ხელისუფლება დანაპირებს? - მივესალმებით და  მხარს დავუჭერთ. არ შეასრულებს? -  საზოგადოებასთან ერთად, არ მოვისვენებთ, სანამ მათ ყველა დანაპირებს არ შევასრულებინებთ“, - თქვა თენგიზ ჯგუშიამ. კომბინატის დასახლებაში მცხოვრები დევნილების ნაწილი საცხოვრებელი პირობების გაუმჯობესებას ადგილზე ითხოვს, ნაწილი კი განსახლებას. „გვეუბნებოდნენ ბინას ფოთში მოგცემთო. იქ ვერ მოვხვდით, რადგან სოციალურად დაუცველის სტატუსი არ გვაქვს. საშინელ პირობებში ვცხოვრობთ, მაგრამ მაინც მაღალი ქულა მოვიდა. მეუღლე მუშაობს მძღოლად და მცირე შემოსავალი გვაქვს. ახლა გვპირდებიან ზუგდიდში მოგცემთო ბინას და ველოდებით“, - ამბობს აფხაზეთიდან დევნილი ლია ელიავა. ამასთან, დევნილები ამბობენ, რომ არჩევნების დასრულების შემდეგ მათთან  ხელისუფლების არც ერთი წარმომადგენელი არ მისულა და პრობლემით არავინ დაინტერესებულა. მათ შორის კომბინატის მაჟორიტარი დეპუტატი ნიკოლოზ ზარქუა. ზუგდიდის საკრებულოს დეპუტატ ნიკოლოზ ზარქუას თქმით,  ის მის საარჩევნო უბანში დევნილებს ხშირად ხვდება და მათი პრობლემები მისთვის ცნობილია. ამასთან, ზარქუამ აღნიშნა, რომ ის  ელიავების ოჯახის პრობლემებით დაინტერესდება და მათ საცხოვრებელ პირობებს პირადად გაეცნობა.