ფოთის სასწავლო ცენტრის ყოფილ შენობაში თვითნებურად შესახლებულმა ოჯახებმა გაფორმების ეკონომიკურ ზონამდე მისასვლელი გზა ხელმეორედ გადაკეტეს. რამდენიმე საათიანი პიკეტის მიზეზი ელექტროენერგიის მიწოდების აღდგენის მოთხოვნა გახდა,რომელიც პირველი პიკეტის შემდეგ არ დაკმაყოფილდა. აქციის მონაწილეების დაშლა საპატრულო პოლიციის თანამშრომლებმა სცადეს,რასაც ურთიერთდაპირისპირება მოჰყვა.ადგილზე ადგილობრივი ხელისუფლების წარმომადგენლებიც მივიდნენ,თუმცა მხარეებმა შეთანხმებას ვერ მიაღწიეს. ფოთის მერიაში განმარტავენ,რომ შესაბამის უწყებებს შორის მოლაპარაკებები ისევ მიმდინარეობს. ფოთის მერის განცხადებით,არის საუბარი იმაზე,რომ აღნიშნულმა ოჯახებმა საერთო მრიცხველით ისარგებლონ,რაზეც ისინი უარს აცხადებენ და ინდივიდუალური მრიცხველებით სარგებლობას მოითხოვენ. ფოთის მერი ირაკლი კაკულია ეჭვობს,რომ ამ მოთხოვნით ისინი ფართების დაკანონებისკენ კიდევ ერთი ნაბიჯის გადადგმას ცდილობენ,რასაც მერია იმ გარემოებიდან გამომდინარე ვერ დაუშვებს,რომ შენობა ეკონომიკის სამინისტროს ბალანსზეა. რაც შეეხება აქციის მონაწილეების გეგმებს, მოთხოვნის შეუსრულებლობის შემთხვევაში დევნილი და სოციალურად დაუცველი ოჯახები პერმანენტული აქციებით იმუქრებიან.