Apple-მა თავისი მობილური საოპერაციო სისტემის განახლებული ვერსია, iOS 8.1 გამოუშვა, რომელშიც დამატებულია ფუნქცია, რომ iPhone კომპიუტერს ან პლანშეტს დაუკავშირდეს და SMS-ების და MMS-ების მიღება იქ გახდეს შესაძლებელი. გარდა ახალი iOS -ისა, Apple-მა აშშ-ში მობილური საგადახდო სისტემა Apple Pay-იც გაუშვა, რომელსაც Visa, MasterCard, American Express და მრავალრიცხოვანი რითეილერები მიურთდნენ. საგადახდო სისტემით სარგებლობას შეძლებენ iPhone 6-ის და iPhone 6 Plus-ის მფლობელები და ასევე ახალი პლანშეტების iPad Air 2-ის და iPad mini 3-ის მომხმარებლებიც. iOS 8.1-ის დასაყენებლად 200 მეგაბაიტი თავისუფალი მეხსიერებაა საჭირო. Apple ჯერ არ ამბობს, როდის იქნება ხელიმისაწვდომი Apple Pay აშშ-ის ფარგლებს გარეთ. ამ სისტემასთან ახლა 220 ათასი რეალური მაღაზიაა მიერთებული ამერიკაში და მომავალი წლიდან აშშ-ში მომუშავე 500 ბანკის დამატება იგეგმება. Apple Pay-ის მეშვეობით გადახდებს მიიღებენ: McDonald’s-ი და Subway, American Eagle Outfitters-ი, Bloomingdales-ი და Macy’s, ავტოგასამართი სადგურები Chevron-ი და Texaco, სათამაშოების მაღაზიები Disney Store და Toys’R’Us -ი და მრავალი სხვა. სისტემა გამოდგება საცხოვრებლის დასაქირავებლად Airbnb-ზე და HotelTonight-ზე. Apple Pay-ის გამოსაყენებლად მომხმარებელმა უნდა დაარეგისტრიროს თავის საბანკო ბარათი. გადახდების წარმოება კი შესაძლებელია თითის ანაბეჭდების სკანერზე, Touch ID-ზე ავტორიზაციის გაკეთებით.