ასოციაცია „მშვიდობიანი და საქმიანი კავკასია“ – ს ორგანიზებით, 23 დეკემბერს ზუგდიდის მუნიციპალიტეტის (რუსი სამხედროების მიერ კონტროლირებადი, გალის რაიონის დაბალი ზონის სოფელ ნაბაკევის მოსაზღვრე) სოფელ ხურჩაში მორიგი  შეხვედრა გაიმართა. მას ასოციაციაში გაერთიანებული აფხაზეთის, ოსეთის და ზუგდიდის მუნიციპალიტეტის სათემო კავშირების წარმომადგენლები ესწრებოდნენ. აღსანიშნავია, რომ საჩხერის რაიონის სოფელ ქარძმანის სათემო კავშირის წევრები ხურჩას უკვე მეორედ  ესტუმრნენ: 25 ოქტომბერს ისინი აქ გამართულ ეროვნული სამზარეულოს ფესტივალში იღებდნენ მონაწილეობას. შეხვედრას ასევე ესწრებოდნენ ევროკავშირის სადამკვირვებლო მისიის წარმომადგენლები. არაფორმალურ შეხვედრაზე, მიმდინარე წელს ჩატარებულ ღონისიძიებებზე ისაუბრეს. როგორც ასოციაცია „მშვიდობიანი და საქმიანი კავკასია“– ს ხელმძღვანელმა ალუ გამახარიამ აღნიშნა, ყველაზე მწვავე პრობლემად აფხაზური მხარის მიერ კონტროლირებად ტერიტორიაზე  გადაადგილების შეზღუდვა რჩება. ე.წ. ადმინსტრაციული საზღვარი, საპასპორტო რეჟიმთან დაკავშირებული სირთულეების გამო, ვერ გადმოლახა აფხაზური სათემო კავშირის რამდენიმე წევრმა. ამ ამხრივ ასოციაციაში გეგმავენ გააძლიერონ ის რეზონანსი, რომელიც ნაბაკეველების მიერ ალექსანდრე ანქვაბთნ გაგზავნილმა მიმართვამ გამიწვია. შეგახსნებთ, გალის რაიონის დაბალი ზონის სოფელ ნაბაკევის მოსახლეობამ მათი მდგომარეობის შემსუბუქების თხოვნის წერილით აფხაზეთის დე ფაქტო პრეზიდენტ ალექსანდრ ანქვაბს, დე ფაქტო პრემიერ-მინისტრ ლეონიდ ლაკერბაიას, დე ფაქტო პარლამენტის დეპუტატებს, ადმინისტრაციის ხელმძღვანელს და სამართალდამცავ ორგანოებს მიმართა. ალუ გამახარიას განცხადებით, აღნიშნული მიმართვა ასევე გადაეგზავნა უფლებადაცველ საერთაშორისო ორგანიზაციებს. შეხვედრის მონაწილეები ხურჩიდან ქუთაისში ჩავიდნენ, ხოლო დღეს კი თბილისში მიემგზავრებიან, სადაც მიმდინარე წლის ღონისძიებებს შეაჯამებენ და სათემო კავშირების საჭიროებების გათვალისწინებით, სამომავლო გეგმებს დასახავენ.