ხობში ეროვნული სასწავლო ოლიმპიადის მეორე წრე დაიწყო, სადაც მუნიციპალიტეტის მასშტაბით მონაწილეობას ოცდაშვიდი სკოლის ის მოსწავლე იღებს, რომელმაც წარმატებით გადალახა პირველი ეტაპი. 180 მოსწავლეს მეთვალყურეობას ცხრამეტი დამკვირვებელი უწევს. ოლიმპიადა ორ სესიად მიმდინარეობს სადაც ბავშვები ცხრა საგანში ასპარეზობენ. ყველაზე მეტი ბავშვი ქართული ენის სექციაშია წარმოდგენილი. ოლიმპიადა საქართველოს განათლებისა და მეცნიერების სამინისტროსა და გამოცდების ეროვნული ცენტრის ხელმძღვანელობით უკვე მეოთხე წელია ტარდება, ის ოთხი დღის განმავლობაში გაგრძელდება და 18 იანვარს დასრულდება. რადიო „ათინათი“ ხობის საგანმანათლებლო რესურსცენტრის უფროსს, ხათუნა გერგაიას დაუკავშირდა. მისი განცხადებით წარმატებული მოსწავლეები მესამე ტურში გადადიან, რომელიც თბილიში ჩატარდება და გამარჯვებულებს განათლების სამინისტრო დააჯილდოვებს.