25 იანვარი სისხლის ჩაბარების საერთაშორისო დღეა. საქართველოს გაეროს ასოციაციისა და იუსტიციის სამინისტროს პროექტი „ჩემი უფროსი მეგობარი“, საქართველოს წითელი ჯვრისა და იაშვილის ბავშვთა კლინიკაში არსებული ლეიკემიით დაავადებულ ბავშვთა ცენტრის მხარდაჭერით, 2013 წლის 25 იანვარს “სისხლის ჩაბარების დღეს” აწყობს. აქციის მთავარი სამიზნე ჯგუფები ლეიკემიით დაავადებული ბავშვები არიან, რომლებსაც თვეში 21 ლიტრამდე სისხლის გადასხმა სჭირდებათ. აქციას, ზუგდიდის მუნიციპალიტეტის გამგეობა და სახანძრო სამაშველო სამსახურები უერთდებიან. როგორც რადიო „ათინათთან“ საუბარში საზოგადოებასთან და მედიასთან ურთიერთობის სამსახურის წარმომადგენელმა მაია ღურწკაიამ აღნიშნა, გამგეობამ სურვილი გამოთქვა აქციაში მონაწილეობა მიიღოს, საჯარო მოხელეები დღის განმავლობაში ჯგუფ–ჯგუფად გავლენ სისხლის ჩასაბარებლად. რადიო „ათინათი“ ასევე დაუკავშირდა წალენჯიხის მუნიციპალიტეტის გამგეობას. გამგებლის მოვალეობის შემსრულებლის მოადგილემ, მერაბ ჯინჯოლიამ განაცხადა, რომ გამგეობა და მუნიციპალიტეტის საკრებულო აქციას უერთდება და პირველი საათიდან წალენჯიხის რაიონულ საავადმყოფოში სისხლს ჩააბარებენ. “სისხლის ჩაბარების დღის” მხარდამჭერები არიან: საქართველოს გაეროს ასოციაცია, საქართველოს იუსტიციის სამინისტრო, საქართველოს წითელი ჯვარი, იაშვილის ბავშვთა კლინიკა, კინოთეატრი "რუსთაველი", ფოტოგრაფი გურამ მურადოვი.