ზუგდიდში დევნილების საკითხზე მომუშავე ორგანიზაცია „აფხაზეთიდან დევნილთა კავშირი“ ჩამოყალიბდა. ორგანიზაცია საქართველოს ყველა რეგიონში შეიქმნება. ზუგდიდში საინიციატივო ჯგუფს 10-მდე წარმომადგენელი ეყოლება. ადგილობრივი ორგანიზაციის თავმჯდომარის პოსტს ოთარ ბერიშვილი დაიკავებს. „აფხაზეთიდან დევნილთა კავშირის“ ერთ-ერთი წარმომადგენლის ლონდერ ცაავას განცხადებით ორგანიზაციის მიზანია გაიზარდოს დევნილი საზოგადოების როლი საკუთარი პრობლემების მოგვარებაში და აღადგინოს აფხაზებსა და ქართველებს შორის დაკარგული ნდობა.

ახლად შექმნილი ორგანიზაციის ხელმძღვანელი ზუგდიდში, ოთარ ბერიშვილი აღნიშნავს, რომ ორგანიზაცია დევნილთა პრობლემებს სისტემატიურ მონიტორინგს გაუწევს და ხელისუფლების ყურამდე მიიტანს.

ზუგდიდის ორგანიზაციის ერთ-ერთი წევრი იქნება იძულებით გადადგილებულ პირთათვის არსებული სამოქალაქო  განვითარების ცენტრის წარმომადგენელი მურმან მალაზონია. მალაზონიამ რადიო "ათინათთან" საუბარში აღნიშნა, რომ  „აფხაზეთიდან დევნილთა კავშირი“ იქნება ღია ორგანიზაცია, სადაც ნებისმიერ დევნილს შეეძლება საკუთარ პრობლემებზე საუბარი.