„საერთაშორისო გამჭვირვალობა-საქართველოს“ ზუგდიდის ოფისმა 2012 წლის საპარლამენტო არჩევნების შემდეგ ზუგდიდის მუნიციპალიტეტში მომხდარი საკადრო ცვლილებების, ასევე 2012 წელს სამეგრელო-ზემო სვანეთის მხარეში საჯარო მოხელეებზე გაცემული ხელფასებისა და პრემიების შესახებ ინფორმაცია გაასაჯაროვა. როგორც რადიო „ათინათს“ „საერთაშორისო გამჭვირვალობა-საქართველოს“ ზუგდიდის ოფისის კოორდინატორმა, მალხაზ ჭკადუამ განუცხადა, საპარლამენტო არჩევნების შემდგომ მთელი ქვეყნის მასშტაბით საჯარო სამსახურებში საკადრო ცვლილებები მიმდინარეობს და ამ მხრივ გამონაკლისს არც სამეგრელოს რეგიონი წარმოადგენს. წარმოდგენილი მონაცემების თანახმად, 2013 წლის 11 იანვარს ზუგდიდის მუნიციპალიტეტის გამგებლის მოვალეობის შემსრულებლის მოადგილემ მერაბ ქვარაიამ თანამდებობა პირადი განცხადების საფუძველზე დატოვა. მისი გადაწყვეტილების საფუძველი გახდა ის გარემოება, რომ მერაბ ქვარაია განზრახი დანაშაულის ჩადენისთვის არის ნასამართლევი. 2012 წლის ნოემბრისა და დეკემბრის თვეში შინაგან საქმეთა სამინისტრომ საპატრულო დეპარტამენტის სამეგრელო-ზემო სვანეთის სამმართველოს 27 თანამშრომელი პირადი განცხადების საფუძველზე კადრების მთავარი სამმართველოს განკარგულებაში გადაიყვანა.“საერთაშორისო გამჭვირვალობა-საქართველოს“ წარმომადგენლებს პოლიციელებმა განუცხადეს, რომ განცხადება ზეწოლის გამო დაწერეს, ხოლო კადრების განყოფილებაში მათი გადაყვანის მიზეზად პოლიტიკური მოტივი დაასახელეს. რაც შეეხება ხელფასებისა და პრემიების მონიტორინგის შედეგებს: „საერთაშორისო გამჭვირვალობა-საქართველოს“ ზუგდიდის ოფისის მიერ გამოთხოვილი საჯარო ინფორმაციის თანახმად, სამეგრელო-ზემო სვანეთის ადმინისტრაციამ თანამშრომლებზე ხელფასის სახით 7 მილიონ ლარზე მეტი გასცა, მათ შორის 2 მილიონ ლარზე მეტი პრემიაა. სპეციალურ ანგარიშში ასევე მოხდა, ინფორმაცია,ზუგდიდში ანდრია დადიანის ძეგლის დადგმისთვის გამოყოფილი თანხის შესახებ. მუნიციპალიტეტის გამგეობამ „საერთასორისო გამჭვირვალობა-საქართველოს ზუგდიდის“ ოფისს ვერ დაუსაბუთა, თუ რატომ არის პრიორიტეტული 200 ათასი ლარის გამოყოფა ძეგლის დასამონტაჟებლად, როდესაც 2013 წლის ბიუჯეტით, უფასო სასადილოებზე 90 ათასი ლარია გამოყოფილი.