ამ წუთებში ზუგდიდის დევნილთა სამმართველოს შენობაში ოკუპირებული ტერიტოერიებიდან იძულებით გადადგილებულ პირთა განსახლებისა და ლტოლვილთა მინისტრის მოადგილე მამუკა ცოტნიაშვილი იმყოფება. ცოტნიაშვილი სამმართველოში შეკრებილ 40–მდე დევნილს ხვდება. დევნილები მას თავიანთი საცხოვრებელი პირობების და სოციალური მდგომარეობის შესახებ უყვებიან. ისინი ცდილობენ მინისტრის მოადგილისგან გაიგონ თუ რა კატეგორიის დევნილები ჩასახლდებიან იმ ახალ კორპუსებში, რომლის მშენებლობაც ზუგდიდში, თბილისის ქუჩაზე იგეგმება. ცოტნიაშვილმა კომენტარი გაააკეთა დევნილთა ნაწილის მიერ გოჩა ელერჯიას მისამართით გამოთქმულ ბრალდებაზე.(რამდენიმე დევნილმა სამმართველოს უფროსის მოადგილე გოჩა ელერჯია დევნილთა კუთვნილი ფართების გარიგებით გასხვისებაში დადანაშაულა). მინისტრის მოადგილის განცხადებით ამ საქმის შესწავლა მიმდინარეობს და მსგავსი ფაქტების აღმოჩენის შემთხვევაში ეს ადამიანები სრული სიმკაცრით დაისჯებიან. ცოტნიაშვილმა ასევე განაცხადა, რომ სამმართველოს უფროსის თანამდებობაზე ახლადდანიშნულმა კანდიდატმა სამინისტროში სრული სამოქმედო გეგმა წარადგინა და ყველა საჭირო პროცედურა გაიარა. რაც შეეხება პრეზიდენტის რეზიდენციასთან გაშლილ კარავში მყოფ დევნილებს, ცოტნიაშვილმა განაცხადა, რომ ამ დრომდე მას არ ჰქონდა ინფორმაცია იმის შესახებ, რომ კარავში დევნილებიც იმყოფებოდნენ. მისივე განცხადებით მას ჰქონდა ინფორმაცია რომ კარვის აქციის მონაწილეები სოციალურად დაუცველები იყვნენ.