წალენჯიხაში პარტია "ქართული ოცნების" რაიონული ორგანიზაცია დაფუძნდა. ორგანიზაციას დღეიდან პროფესიით ჟურნალისტი, ბერდია კალანდია უხელმძღვანელებს. პარტიის ყრილობაზე უმრავლესობის წარმომადგენელი  ელისო ჩაფიძე, ზუგდიდის "ქართული ოცნების" რაიონული ორგანიზაციის ხელმძღვანელი, ლაშა გოგია და "დაიცავი საქართველოს" წარმომადგენელი კახა მიქაია ესწრებოდნენ. ელისო ჩაფიძემ აუდიტორიას სიტყვით მიმართა და უახლესი ისტორიის ექს-კურსი გააკეთა. როგორც ჩაფიძემ განაცხადა "ისინი არ დაუშვებენ, რომ საქართველო საკნებისა და კორუფციის ხანაში დაბრუნდეს". ყრილობის დაწყებამდე  წალენჯიხის "ქართული ოცნების" აქტივისტების ნაწილმა ჩაფიძეს მათი პრეტენზიები ბერდია კალანდიას კანდიდატურასთან დაკავშირებით მოახსენეს. ჩაფიძის თქმით, თითოეულ  იმ ადამიანს, ვინც წინასაარჩევნოდ "ქართული ოცნების" რიგებში იდგა მიუხედევად ზეწოლისა და მუქარისა მიეცემა შესაძლებლობა პაარტიაში გაწევრიანდეს. ყრილობაზე დასწრების მანდატი 90 ადამიანზე იყო გაცემული. დელეგატების უმრავლესობას სკოლის პედაგოგები წარმოადგენდნენ. ბერდია კალანდიას კანდიდატურა ხმათა უმრავლესობით 87 -3 წინააღმდეგ დამტკიცდა. რადიო "ათინათის" კითხვაზე თუ როგორ შეაფასებდა  იმ ფაქტს, რომ დელეგატთა უმრავლესობა იყო ახლად გაწევრიანებული და "ქართული ოცნების" აქტივისტთა დიდ ნაწილს ყრილობაზე დასწრების საშუალება არ მიეცა. ჩაფიძის განმარტებით, ყველა იმ ადამიანს მიეცემა შესაძლებლობა, რომ პარტიაში გაწევრიანდეს და ჩვენთან ერთად გააგრძელოს ქვეყნის კეთილდღეობისთვის ბრძოლა. რაიონული ორგანიზაციის თავმჯდომარე, ბერდია კალანდიას განცხადებით - " ეს იყო "ქართული ოცნების" პირველი გამარჯვება წალენჯიხაში და მე ყველაფერს გავაკეთებ იმისთვის რომ ყველაზე პრობლემატური საკითხები, როგორიცაა სოფლის მეურნეობა, განათლება და ა.შ რაიონში პრიორიტეტული იყოს".