ზუგდიდის შალვა დადიანის სახელობის დრამატულ თეატრს, კულტურისა და ძეგლთა დაცვის მინისტრი გურამ ოდიშარია ესტუმრა. მინისტრს თან ახლდა პირველი მოადგილე, მარინე მიზანდარი და მინისტრის მრჩევლები ბადრი ბაგრატიონ-გრუზინსკი და გიორგი გეგეჭკორი. კულტურის მინისტრმა  ზუგდიდის თეატრი ხელმძღვანელობასთან, თეატრის დასთან და რეჟისორთან ერთად დაათვალიერა. თეატრს წლებია აწვიმს, რის შედეგადაც ჭერი ნახევრად ჩამოშლილია, თუმცა თეატრი, ამ დრომდე საბჭოთა კავშირის დროინდელი განათებით და სხვა ტექნიკური მოწყობილობით მოღვაწეობს. დამპალი იატაკი და ობ მოდებული გარდერობი, ეს  თეატრის დღევანდელი რეალობაა. როგორც ზუგდიდის დრამატული თეატრის ხელმძღვანელმა მაია კალანდიამ აღნიშნა, წინა წლების გაანგარიშებით დაახლოებით  მილიონ ნახევარი ლარია სარეაბილიტაციო სამუშაოებისთვის საჭირო. "ზუგდიდის თეატრი არის ძალიან მძიმე მდგომარეობაში. ესეთი მდგომარეობა მე თეატრში ფაქტიურად არ მინახავს ის ნახევრად დაშლილია. თვითონ განათების სისტემიდან დაწყებული საგრიმიორო არ არსებობს. ასევე არ არსებობს რეკვიზიტების დასამზადებელი ოთახი." განაცხადა თეატრის დათვალიერების შემდეგ გურამ ოდიშარიამ. მისივე თქმით, კულტურის სამინისტრო ვალდებულია ყველაფერი გააკეთოს იმისთის, რომ უზარმაზარი ტრადიციების მატარებელი თეატრი წელში გაიმართოს. თუმცა რადიო "ათინათის" კითხვაზე აქვს თუ არა  სამინისტროს კონკრეტული გეგმა?  მინისტრმა გვიპასუხა, რომ  კონკრეტული გეგმა არ ასრებობს, თუმცა  სამუშაო პრიორიტეტები განისაზღვრა და ერთ-ერთი პრიორიტეტი სწორედ რეგიონებში თეატრის დახმარებაა. გნაცხადა გურამ  ოდიშარიამ. თეატრის ხელმძღვანელს, შთაბეჭდილება რჩება, რომ აქამდე კულტურის მინისტრს არ სჯეროდა თეატრში არსებული ვითარების მიუხედავად იმისა, რომ სამინისტრო თეატრის მდგომარეობის ამსახველ ფოტო-ვიდეო მასალას ფლობდა. თეატრის ხელმძღვანელი ასევე იმედს გამოთქვამს, რომ უახლოეს მომავალში თეატრის, სარესტავრაციო სამუშაოები დაიწყება.