ზუგდიდის დემოკრატიული ჩართულობის ცენტრში კვლევითი პროექტის , „ქართულ აფხაზური გამყოფი ხაზის გასწვრივ მცხოვრები სამეგრელო –ზემო სვანეთის მოსახლეობის პრობლემები და საჭიროებები“ პრეზენტაცია გაიმართა.

მოცემული კვლევის კონკრეტული ამოცანა აფხაზეთთან, ადმინისტრაციული საზღვრის გასწვრივ მდებარე სამეგრელო ზემო სვანეთის დასახლებაში მოსახლეობის სოციალურ ეკონომიკური პირობებისა და ცხოვრების დონის შესწავლა იყო. განსაკუთრებული ყურადღება მოსახლეობის კეთილდღეობისა და ცხოვრების დონის გასაუმჯობესებლად მიმართული სამთავრობო და არასამთავრობო პროგრამებისა და პროექტების ეფექტურობის შეფასებას დაეთმო.

როგორც მკვლევარმა ანა დიაკონიძემ აღნიშნა, ძირითადად ეკონომიკური საკითხები, უმუშავრობა, სიღარიბე, სამედიცინო სოციალური პაკეტის არ არსებობა გამოიყო. ასევე, მოსახლეობა მწვავედ აღიქვამს რუსეთთან და აფხაზეთთან ურთიერთობას.

კვლევის ერთ–ერთი მნიშვნელოვანი ნაწილი იმის განსაზღვრა იყო თუ რამდენად მნიშვნელოვანი და ეფექტურია საერთაშორისო ორგანიზაციების მიერ გატარებული პროგრამები.

როგორც ანა დიაკონიძემ აღნიშნა ყურადღება მახვილდება ახალგაზრდებზე, მაგრამ სამწუხაროდ პრობლემები, საშუალო ასაკის ფენაზე იკვეთება, რომლებისთვისაც თითქმის არაფერი კეთდება.