წალენჯიხის მუნიციპალიტეტის საკრებულოს სხდომას ხმაური მოყვა. როგორც რადიო „ათინათს“ წყარომ შეატყობინა ხმაური სხდომაზე წალენჯიხის გამგეობაში ამ დრომდე განუხორციებელმა საკადრო ცვლილებებმა გამოიწვია. აღნიშნულ საკითხთან დაკავშირებით რადიო „ათინათი“ წალენჯიხის მუნიციპალიტეტის გამგებელს, გოგა გულორდავას დაუკავშირდა. გულორდავას განცხადებით, გამგეობის ინიციატივით სხდომაზე გავიდა საკითხი, რომლის მიხედვითაც გამგეობისა და საკრებულოს თანამშრომლები ტესტირებას ხოლო თანმადებობებზე მოვალეობის შემსრულებლები კონკურსს გაივლიან. მისივე თქმით, აღნიშნული საკითხი სხდომაზე ერთხმად დამტკიცდა და უახლოეს მომავალში თანამშრომელთა საატესტაციო-საკონკურსო პროცესი დაიწყება. "საჯარო მოხელეები სამ წელიწადში ერთხელ მაინც უნდა გადიოდნენ ტესტირებას. ჩვენ ვნახავთ ტესტირების შედეგებს და შესაბამისად განვიხილავთ მათ კანდიდატურას დაკავებულ თანამდებობაზე". განაცხადა რადიო „ათინათთან“ საუბარში გოგა გულორდავამ. გამგეობის თანამშრომლები რადიო „ათინათთან“ პირად საუბრებში აღნიშნულ საკითხს „ფსევდო“ კვალიფიკაციის შემოწმებად აფასებენ და დასძენენ, რომ ეს უფრო სამუშაო ადგილების გამოთავისუფლების პროცესია.