ზუგდიდის მუნიციპალიტეტის განვითარების 2013 –2017 წლის საშუალო ვადიანი პროგრამა საკრებულოს სხდომაზე დაამტკიცეს. პროგრამა ხიდების, ნაპირსამაგრებისა და სოფლამდე მისასვლელი გზების მშენებლობას მოიცავს. მასში ასევე შესულია ყველა ის პროექტი რომელიც 5 წლის განმავლობაში უნდა განხორციელდეს. საკრებულოს ეკონომიკისა და ინფრასტრუქტურის კომისიის თავმჯდომარემ, დავით სხულუხიამ აღნიშნა, რომ საშუალო ვადიან პროგრამაში გათვალისწინებულია ჰიდროტექნიკური, ნაპირსამაგრების და ნაგებობების რეაბილიტაცია ორსანტიასა და შამგონაში. ასევე დაწყებულია ანაკლია განმუხურის გზის რეაბილიტაცია. რაც შეეხება ანაკლიის პორტის მშენებლობას, ის დროებით შეჩერებულია. დავით სხულუხიას განმარტებით ანაკლიის პორტის მშენებლობა სპონსორის პოვნისა და დაფინანსების შემდეგ გაგრძელდება. საშუალო ვადიან პროგრამაში განხილულ იქნა დადიანების სასახლის, შალვა დადიანის დრამატული თეატრისა და ყინულის სასახლის რეაბილიტაცია, ასევე კომბინატში სტადიონის მშენებლობა, შიდა გზებისა და გარე განათებების დამონტაჟება. როგორც დავით სხულუხიამ აღნიშნა პროგამაში გათვალისწინებულია სკოლამდელი დაწესებულებების ცენტრების მატერიალური ბაზებით აღჭურვა. აღნიშნული სამუშაოების დაწყება გაზაფხულზე, სავარუდოდ აპრილის თვეში დაიწყება.