ქვეყნის დეცენტრალიზაციის გამოწვევბსა და პერსპექტივებზე სამოქალაქო განვითარების სააგენტო „სიდას“ ფასილიიტაციით „სამოქალაქო საზოგადოების რეგიონული ქსელის“ წევრი ორგანიზაციების სამუშაო შეხვედრა გაიმართა. შეხვედრაზე არასამთავრობო ორგანიზაციების საქმინობის უკეთ წარმოჩენის გაუმჯობესებისა და მედიასთან ეფექტური ურთიერთობების ჩამოყალიბების საკითხებზე იმსჯელეს.  განსაკუთრებული ყურადღება გამახვილდა დეცენტრალიზაციის ახალ კონცეფციასა და თვითმმართველობის  რეფორმაზე. სამოქალაქო განვითარების სააგენტო „სიდა“ საქართველოს მთავრობის დეცენტრალიზაციისა და თვითმმართველობის განვითარების ძირითადი პრინციპების შესახებ სარეკომენდაციო პაკეტს ამზადებს. აღნიშნულ პაკეტში მოცემული იქნება რეგიონალურ დონეზე ჩატარებული კვლევები იმ რისკებთან დაკავშირებით, რომელიც შეიძლება თან ახლდეს დეცენტრალიზაციას. შემუშავებული პაკეტის მიმოხილვა ჯერ თვითმმართველობის კომიტეტში გაიმართება, ხოლო შემდეგ უკუკავშირისთვის სამინისტროებს გაეგზავნებათ. „სიდას“ რეგიონული განვითარების მენეჯერმა, ჯუბა მარუაშვილმა დეცენტრალიზაციის დადებით და უარყოფით მხარეებზე ისაუბრა. მან აღნიშნა, რომ არის მთელი რიგი შეკითხვები რეფორმის მოსამზადებელ სამუშაოებთან და ქვეყნის მართვის საკანონმდებლო თუ სტრუქტურულ დონეზე დაგეგმილ ცვლილებებთან დაკავშირებით. მისივე თქმით მნიშვნელოვანი საკითხია კანონში შესატანი ცვლილების მომზადების პროცესი, რომელის პირველი ეტაპი მთავრობის მიერ მიღებული გადაწყვეტილების თანახმად 2013 წელს უნდა დასრულდეს. დარჩენილი დრო კი კანონის ინიცირებისთვის საჭირო ყველა საკითხის განსახილველად საკმარისი არ არის-, აღნიშნავს  ჯუბა მარუაშვილი. ცვლილებების მომზადების ვადებთან ერთად მნიშვნელოვანია საზოგადოების ინფორმირებულობის დონის ამაღლებაც. აუცილებელია ადამინმა იცოდეს დეცენტრალიზაციის შემთხვევაში რა იცვლება მისთვის სასიკეთოდ და პირიქით, რა უარყოფითი შედეგი შეიძლება ახლდეს პროცესს. „სიდას“  წარმომადგენლები აღნიშნავენ, რომ ძირითადი რისკები და გამოწვევები, რაც  დეცენტრალიზაციის პროცესს ახლავს არის პოლიტიკური მიუკერძოებლობის გამორიცხვა საზოგადოებრივ საბჭოებში, ნაკლები საჯარო განხილვა, თვითმმართველობების არასათანადო ჩართულობა სტრატეგიის განხილვის პროცესში, ასევე მოსალოდნელი წინააღმდეგობები სტრატეგიასა და კანონს შორის. მათ ასევე ისაუბრეს დეცენტრალიზაციის პოზიტიურ მხარეებზეც და აღნიშნეს, რომ ძირითადი პოზიტივი პროცესისა არის ის, რომ გაიზრდება მოქალაქეების ჩართულობის დონე ადგილობრივი მნიშვნელობის საკითხების გადაწყვეტის პროცესში და გაუმჯობესდება საზოგადოებრივი მომსახურობის მიწოდების ხარისხი , ასეევ საქართველოში ჩამოყალიბდება ორდონიანი თვითმმართველობა და ადგილზე შეიქმნება ინიციატივიან პირთა გამოვლენისა და კარიერული ზრდის შესაძლებლობა. სამუშაო შეხვედრები სამოქალაქო განვითარების სააგენტო „სიდამ“„სამოქალაქო საზოგადოების რეგიონული ქსელის“ წევრ ორგანიზაციებთან 13 მარტს დაიწყო და თითქმის ყვლა რეგიონში ჩაატარა.