კოალიცია „ქართული ოცნების“  საარჩევნო შტაბის ყოფილი ხელმძღვანელი მერაბ ქვარაია უმცირესობის წარმომადგენლის, ირმა ნადირაშვილის მიერ ერთ-ერთ  ტელევიზიაში გაკეთებულ  ბრიფინგს გამოეხმაურა. ქვარაიას თქმით, ნადირაშვილმა ბევრი დეზინფორმაცია გაავრცელა და მათ შორის ყურადღება,  ბრიფინგის იმ ნაწილზე გაამახვილა, სადაც ნადირაშვილმა ქვარაიას პატიმრობის პერიოდზე ისაუბრა და აღნიშნა რომ ქვარაია დღეის მონაცემებით ზუგდიდში საჯარო სამსახურში ერთერთ მაღალ თანამდებობას იკავებს. „ დიახ,  მე ვიყავი პატიმარი და ნაციონალური მოძრაობის დროს  ექვს  წელიწადნახევარი საპყრობილეში გავატარე. დიახ, მე ვიყავი  როლანდ ახალაიას მიერ დაპატიმრებული“. განაცხადა მედიასთან საუბარში ქვარაიამ. ნადირაშვილის განცხადება  ქვარაიამ სიცრუედ შეაფასა და განაცხადა, რომ ამ დროისთვის  საჯარო სამსახურში ის არავითარ თანამდებობას  არ იკავებს, თუმცა მომავალში ქყვეყნის კეთილდღეობის  სამსახურში ყოფნას არ გამორიცხავს. ქვარაიამ მედიასთან საუბარში ასევე აღნიშნა, რომ  არაერთმა არასამთავრობო თუ პოლიტიკურმა ორგანიზაციამ შეისწავლა მისი პატიმრობის საკითხი და იგი  პოლიტპატიმრადაა აღიარებული.