ზუგდიდის მუნიციპალიტეტის ადგილობრივი თვითმმართველობის ორგანოთა საქმიანობის მონიტორინგის საინიციატივო ჯგუფის წევრებმა მესამე შუალედური ანგარიში წარადგინეს. შეხვედრაზე საუბარი იყო მონიტორინგის ჯგუფის მიერ „სოფლის მხარდაჭერის სახელმწიფოს პროგრამის“ ფარგლებში ზუგდიდის მუნიციპალიტეტში ჩატარებულ სოფლის კრებებზე აღმოჩენილ პროცედურულ დარღვევებზე, კერძოდ გამოვლინდა სოფლის კრებების შემაჯამებელი მონიტორინგის ოქმების გასაჯაროებასთან დაკავშირებული პრობლემები, ჯგუფის წევრების განცხადებით კრებებზე არ მიმდინარეობდა დამსწრეთა მონიტორინგი და არ მომხდარა პრიორიტეტების მარტივი კენჭისყრის გზით შერჩევა. მუნიციპალიტეტის გამგეობის საზოგადოებასთან და მედიასთან ურთიერთობის სამსახურის ბიუროს უფროსმა მაია ღურწკაიამ აღნიშნულთან დაკავშირებით განაცხადა, რომ სოფლის კრებები პროცედურული დარღვევებით არ მიმდინარეობდა და გამგეობის სამსახურს ყველა შემაჯამებელი ოქმი გააჩნია, დაინტერესებულ პირებს კი მათი მიღება საჯარო ინფორმაციის გამოთხოვის გზით შეუძლიათ. ყურადღება გამახვილდა მუნიციპალიტეტის ბიუჯეტიდან თანხების არამიზნობრივ ფლანგვაზე, კერძოდ ზუგდიდის მუნიციპალიტეტის კუთვნილებაში არსებული საფეხბურთო კლუბ „ზუგდიდის“ დაფინაფსებისთვის ადგილობრივი ბიუჯეტიდან 700 ათასი ლარი იქნა გამოყოფილი. მონიტორინგის ჯგუფის წევრები მიიჩნევენ, რომ მუნიციპალიტეტის ფინანსური რესურსები ძალიან მწირია, იმისთვის, რომ საშუალოზე დაბალი დონის საფეხბურთო კლუბის დაფინანსებისთვის ამ ოდენობის თანხა გამოიყოს. საბიუჯეტო პრირიტეტების არასწორ დაგეგმვად და ფინანსების არაეკონომიურ ხარჯვად აფასებენ „საინიციატივო ჯგუფის“ წევრები ქალთა საერთაშორისო დღისა და ჟურნალისტიკის დღისადმი მიძღვნილი ღონისძიებების დაფინანსებას. აღნიშნული ღონისძიებებისთვის მუნიციპალიტეტის გამგეობამ საერთო ჯამში 9 319 ლარი დახარჯა. აღნიშნულთან დაკავშირებით მუნიციპალიტეტის გამგეობის საზოგადოებასთან და მედიასთან ურთიერთობის სამსახურის ბიუროს უფროსი მაია ღურწკაია აცხადებს, რომ გამგეობამ კულტურული ღონისძიებებისთვის გათვალისწინებული თანხები წინა წლებთან შედარებით შეამცირა და გაზარდა სოციალური პროექტებისთვის გათვალისწინებული თანხის ოდენობა. „საინიციატოვო ჯგუფის წარმომადგენლები“ მაწანწალა ძაღლებთან დაკავშირებული პრობლემების აღმოფხვრის მექანიზმებსაც შეეხნენ და აღნიშნულთან დაკავშირებით მუნიციპალიტეტის გამგეობას მიმართეს თხოვნით გაითვალისწინებულ იქნას, რომ მაწანწალა ძაღლების საჯაროდ, ცეცხლსასროლი იარაღით მოკვლა ეწინააღმდეგება საზოგადოდ მიღებულ ჰუმანურობის პრინციპს და წარმოადგენს საქართველოს კანონმდებლობით გათვალისწინებულ სისიხლის სამართლებრივ დანაშაულს. შეხვედრაზე ასევე ყურადღება გამახვილდა ადგილობრივი თვითმმართველობის რეფორმის პრობლემებსა და პერპექტივებზე, საინიციატივო ჯგუფი მიიჩნევს, რომ სამოქალაქო საზოგადოებამ აქტიური მონაწილეობა უნდა მიიღოს რეფორმის განხორციელებაში, ხოლო საქართველოს მთავრობამ მაქსიმალურად უნდა გამორიცხოს კანონგარეშე ჩარევები ადგილობრივი თვითმმართველობის ორგანოთა საქმიანობაში. „ადგილობრივი თვითმმართველობის მონიტორინგის საინიციატივო ჯგუფმა“ ყველა აღნიშნულ საკითხთან დაკავშირებით რეკომენდაციები შეიმუშავა. შეხვედრას არ დასწრებიან ადგილობრივი თვითმმართველობის წარმომადგენლები. საინიციატივო ჯგუფის წარმომადგენელმა, ნუგზარ გაბელიამ აღნიშნა რომ მათ მიერ მომზადებულ რეკომენდაციებს ყველა დაინტერესებული მხარე მიიღებს.