საერთაშორისო გამჭვირვალობა საქართველოს ზუგდიდის ოფისის წარმომადგენლები სამეგრელო-ზემო სვანეთის მხარის მუნიციპალიტეტების ახალი ხელმძღვანელების მიერ თანამშრომლებზე პრემიების დაუსაბუთებლად გაცემაზე საუბრობენ. საერთაშორისო გამჭვირვალობის წარმომადგენლები ადმინისტრაციული ორგანოებიდან მიღებულ საჯარო ინფორმაციაზე დაყრდნობით აცხადებენ, რომ 2013 წლის პირველი სამი თვის განმავლობაში სამეგრელო ზემო-სვანეთის თვითმმართველ ერთეულებში პრემიის სახით ჯამში 775 328 ლარი იქნა გაცემული. გამჭვირვალობის წარმომადგენლები აცხადებენ, რომ პრემიების გაცემის დროს კვლავ შეიმჩნევა არსასურველი ტენდენციები, კერძოდ პრემიის გაცემა ხდება კანონის მოთხოვნათა იგნორირებით, გაუგებარია რა განსაკუთრებული წვლილისა და დამსახურებისთვის გაიცემა ისინი და ასევე გაუმჭვირვალეა პრემიების რაოდენობის განსაზღვრის პრინციპი. საერთაშორისო გამჭირვალობის ზუგდდის ოფისის წარმომადგენელი არჩილ თოდუა მიიჩნევს, რომ პრემიების გაცემა საჯარო სამსახურებში არსებული დაბალი ხელფასებით და კვალიფიციური კადრების მოზიდვით არის განპირობებული. „ჩვენ მიგვაჩნია, რომ აღნიშნული პრობლემის მოგვარება სამართლებრივ ჩარჩოებში მარტივად არის შესაძლებელი, აუცილებელია მოხელეთა იმდაგვარი სახელფასო განაკვეთის შემუშავება, რომ მისი გაცემა უფრო მოქნილი და გამჭვირვალე გახდეს",-აცხდადებს არჩილ თოდუა. 2013 წლის პირველი სამი თვის მონაცემებით ზუგდიდის გამგეობაში პრემიები სახით 214 150 ლარი გაიცა, ხოლო საკრებულოს აპარატის თანამშრომლებზე კი 84 830 ლარი. ზუგდიდის მუნიციპალიტეტის საბიუჯეტო სამსახურის უფროსი თამილა ნასარიძე პრემიების გაცემი აუცილებლობას საჯარო პირების დაბალი ხელფასით ხნის. „საპრემიო პრაქტიკა ყოველთვის არსებობდა, ეს არ იყო არანაირი დანაშაული არასოდეს, მაშინ როცა 300 ლარია ხელფასი დამატებით სადღესასწაულოდ პრემიების გაცემა არ არის დანაშაული",-აღნიშნავს ნასარიძე. პრემიები მიიღეს ასევე აბაშის, სენაკის, მარტვილისა და მესტიის გამგეობისა და საკრებულოს აპარატის თანამშრომლებმა. 17 910 ლარის ოდენობის პრემია მიიღეს თვითმმართველ ქალაქ ფოთის საკრებულოს სამსახურის თანამშრომლებმა. თანამშრომლებზე პრემიები არ გაუცემულა სამეგრელო-ზემო სვანეთის სამხარეო ადმნისტრაციაში და ასევე წალენჯიხის, ხობისა და ჩხოროწყუს მუნიციპალიტეტის თვითმართველ ორგანოებში. საერთო ჯამში გაცემული პრემიების რაოდენობამ აღნიშნული 5 მუნიციპალიტეტის გამგეობაში 573 313 ლარი შეადგინა, ხოლო საკრებულოებში 202 015 ლარი.