ქართული ალკოჰოლური სასმელების პირველი პარტია რუსეთში უკვე გაიგზავნა. ღვინის ეროვნული სააგენტოს თავმჯდომარე, ლევან დავითაშვილმა დღეს გამართულ პრესკონფერენციაზე განაცხადა, რომ ამ ეტაპზე კახური ტრადიციული მეღვინეობის მიერ წარმოებული 20 000 ბოთლი კონიაკიგაიგზავნ, აღნიშნულ პროდუქციას საქართველოს საბაჟოს პროცედურები უკვე გავლილი აქვს. მისივე ინფორმაციით სერტიფიკატი გადაცემული აქვს "დუგლაძის ღვინის კომპანიასაც" და ამ კომპანიის მიერ წარმოებული ღვინო უახლოეს დღეებში გაიგზავნება. "ამ კვირას, პირველად, 2006 წლის ემბარგოს შემდეგ გაიცა პირველი საექსპორტო სერტიფიკატები და დოკუმენტაცია ქართულ ღვინოსა და ალკოჰოლურ პროდუქტებზე, ეს არის ძალიან აღსანიშნავი ფაქტი. ფაქტიურად ემბარგო ალკოჰოლურ სასმელებზე და მინერალურ წყლებზე დასრულდა და ამ კვირის განმავლობაში ქართული კონიაკისა და ღვინის პირველი პარტია გაიგზავნება რუსეთში. კერძოდ, საქართველოს საბაჟოს პროცედურები უკვე გავლილი აქვს კახური ტრადიციული მეღვინეობის მიერ წარმოებულ 20 000 ბოთლ კონიაკს და ასევე სერტიფიკატი გადაცემული აქვს "დუგლაძის ღვინის კომპანიას", რომლის წარმოებული ღვინოც უახლოეს დღეებში გაიგზავნება", - განაცხადა ლევან დავითაშვილმა. მისივე თქმით, რაოდენობა გაიზრდება, იქიდან გამომდინარე, რომ მილიონი ბოთლი ღვინის აქციზური მარკა უკვე შეკვეთილია. ამასთან, როგორც ღვინის ეროვნული სააგენტოს თავმჯდომარე განმარტავს, ტრანსპორტირებას რამდენიმე დღე სჭირდება, ასევე რამდენიმე დღე შეიძლება დასჭირდეს პროდუქტის ლოჯისტიკას, განბაჟებას, დასაწყობებას და დახლზე განთავსებას. მისივე თქმით, ქართული ალკოჰოლური სასმელები იქნება საშუალო და მაღალ საფასო სეგმენტში და მისი ღირებულება დაახლოებით 300-400 რუბლი იქნება. ამასთან, როგორც ღვინის ეროვნული სააგენტოს თავმჯდომარე განმარტავს, სერტიფიკატის მისაღებად რიგში კიდევ 65-მდე კომპანია დგას.