სამოქალაქო მოძრაობა „სამეგრელოს ხმა“ სამეგრელოს რამდენიმე სოფელში წყალგაყვანილობის სიტემიდან ამოღებული მილების საქმის გამოძიების დაჩქარებას და დაზარალებულებისთვის ზარალის ანაზღაურებას ითხოვს. აღნიშნულ საკითხზე გამოძიების მიმდინარეობის შესახებ ინფორმაციის მიღებას „სამეგელოს ხმის“ წარმომადგენლები სამეგრელო- ზემო სვანეთის  პოლიციის სამმართველოსგან ითხოვს. ამ მოთხოვნით ორგანიზაციამ დღეს სამმართველოში განცხადება შეიტანა. წყლის მილების ამოღება ზუგდიდისა და წალენჯიხის რამოდენიმე სოფელში დეკემრის თვეში მოხდა. რის შემდეგაც მოსახლეობის ნაწილი  სასმელი წყლის გარეშეა დარჩენილი. აღნიშნულთან დაკავშირებით სოფელ, რიყის პალურისა და დარჩელის მოსახლეობამ რამოდენიმე ხნის წინ საპროტესტო აქცია გამართა. აქციაზე მოსახლეობა მილების ამოღების ფაქტის გამოძიებას და მათთვის წყლის მიწოდების აღდგენას ითხოვდა. ამ ეტაპზე საქმეს საოლქო პროკურატურა იძიებს. სამოქალაქო მოძრაობა „სამეგრელოს ხმის“ წარმომადგენლის ციცინო შენგელიას  განცხადებით, მათ მიმართეს სამმართველოს იმის გასარკვევად არის თუ არა აღნიშნულ საკითხთან დაკავშირებით მოწმეები დაკითხული. „იგივე განცხდაებით ორშაბათს ჩვენ ზუგდიდის მთავარ პროკურორს მივმართავთ, რომ მოგვაწოდოს ანალოგიური, კანონით დაშვებული ინფორმაცია, საქმის მიმდინარეობასთან დაკავშირებით“-აღნიშნავს ციცინო შენგელია.