„საერთაშორისო გამჭვირვალობა-საქართველოს“ ზუგდიდის ოფისის წარმომასდგენლების ორგანიზებით დღეს, 5 ივლისს დემოკრატიულ ჩართულობის ცენტრში, საჯარო მოხელეებზე პრემიებისა და სახელფასო დანამატების გაცემის პრაკტიკაზე, საჯარო დისკუსია გამართა. შეხვედრას ესწრებოდა , როგორც სამთვარობო, ისე არასამთავრობო ორგანიზაციის წარმომადგენლები. „საერთაშორისო გამჭვირვალობა- საქართველოს“ სამეგრელო-ზემო სვანეთის კოორდინატორმა მალხაზ ჭკადუამ შეხვედრაზე განაცხადა, რომ რეგიონში პრემიებისა და სახელფასო დანამატების გაცემა ყოველგვარი დასაბუთების გარეშე კვლავ გრძელდება. მანვე, საჯარო ინფორმაციაზე დაყრდნობით განმარტა, რომ მიმდინარე წლის აპირილიდან ივნისის ჩათვლით, სამეგრელო-ზემო სვანეთის 9 რეგიონში პრემიის სახით 775. 328 ათასი ლარი გაიცა. თუმცა მისივე თქმით, ზოგიერთ მუნიციპალიტეტში პრემიების გაცემა არ დაფიქსირებულა. „არ ვიცი რეკომენდაციების წყალობით მოხდა ეს თუ ასეთი პოლიტიკა აირჩია ზოგიერთმა მუნიციპალიტეტმა, მაგრამ ფაქტია, რომ პირველი სამი თვის მანძილზე პრემიები არ დაურიგებია ზოგიერთ მუნიციპალიტეტს. ესენია: ხობი, ჩხოროწყუ, წალენჯიხა და თვითმმართველი ქალაქი ფოთი“, - ამბობს მალხაზ ჭკადუა. ზუგდიდის მუნიციპალიტეტის გამგეობის საფინანსო სამსახურის უფროსი ნანი მიქენაია „გამჭვირვალობის“ წარმოამდგენლების პოზიციას დაეთანხმა და აღნიშნა, რომ  საჯარო მოხელეებზე პრემიების გაცემის პრაქტიკის დამკვიდრებას ხელი დაბალმა ხელფასებმა შეუწყო. თუმცა მანვე აღნიშნა, რომ ზუგდიდის მუნიციპალიტეტის ბიუჯეტში ხელფასები და სახელფასო დანამატები კანონით გათვალისწინებულ ნორმას არ აჭარმებს. შეხვედრას ასევე ესწრებოდნენ სხვადასხვა არასამთავრობო ორგანიზაციების წარმომადგენლები, რომლებმაც ცალსახად აღნიშნეს, რომ პრემიების გაცემა მუნიციპალიტეტის გამგეობებში დამსახურებების გარეშე ხდება. სამოქალაქო დარბაზის „სამეგრელოს ხმის“ წარმომადგენელი ბეჯან შანავა ამბობს, რომ კონკრეტულად, ზუგდიდში  თანამდებობებზე ადამიანების დანიშვნაც და პრემიების გაცემაც ნაცნობობით ხდება და მისივე თქმით ეს პრაქტიკა აუცილებლად უნდა შეიცვალოს. „საერთაშორისო გამჭვირვალობა- საქართველო“  მუნიციპალიტეტებს ასევე, რეკომენდაციებს სთავაზობს, სადაც დეტალურად იქნება გაწერილი პრემიების გაცემის სიხშირე, წესი და ოდენობა. „ჩვენ, ყველა მუნიციპალიტეტს ვთავაზობთ რეკომენდაციას იმ პირობებში, როდესაც არ არის დარეგულირებული პრემიების გაცემის წესები საქართველოში. მუნიციპალურ დონეზე იქნეს შემუშავებული გარკვეული რეგულაციები და საკრებულოს მიერ მიღებული დადგენილებით უნდა განისაზღვროს პრემიების გაცემის წესი“, განუცხადა ჟურნალისტებს „საერთაშორისო გამჭვირვალობა- საქართველოს“ ანალიტიკოსმა არჩილ თოდუამ. ზუგიდის მუნიციპალიტეტის გამგებლის მოადგილის მოვალეობის შემსრულებელი მერაბ ქვარაია აცხადებს, რომ გამჭვირვალობის რეკომენდაციებს გამგეობა აუცილებლად გაითვალისწინებს და აღნიშნულ საკითხზე შეხვედრები მომავალშიც გაიმართება.