ზუგდიდის მუნიციპალიტეტის გამგებლის მოადგილის მოვალეობის შემსრულებელმა მერაბ ქვარაიამ, ვლაქერნობის დღესასწაულთან დაკავშირებული კვირეულის ფარგლებში დაგეგმილი  ღონისძიებები მედიას გააცნო. ვლაქერნობის კვირეული, 9 ივლისს 15:00 საათზე ზუგდიდის არტ-გალერეაში ზუგდიდელი მხატვრების ნამუშევრების გამოფენით გაიხსნება. 10 ივლისს შ. დადიანის სახელობის დრამატულ თეატრში 20:00 სთ-ზე დოკუმენტური ფილმების „მიწის სჯული და „ქრისტეს დედულეთი“ ჩვენება  გაიმართება. მუსიკალურ-ლიტერატურულ საღამოს - „ვლაქერნობა-წარმოგიდგენთ საქართველოს“,  11 ივლისს 15:00 სთ-ზე სამხატვრო გალერეა უმასპინძლებს. სამეცნიერო კონფერენცია, რომელიც  12 ივლისს ნიკოსეული სასახლის დარბაზში 15:00 საათზე გაიმართება, დადიანების ისტორიულ -არქიტექტურულ-მუზეუმში დაცულ სიწმინდეებს  მიეძღვნება. კვირეულის  ფაგლებში 13 ივლისს 20:00 სთ-ზე  შალვა დადიანის სახელობის  დრამატულ თეატრში  ლიტერატურულ-მხატვრული კომპოზიცია - „წმინდა ანდრია პირველწოდებული და საქართველო“  გაიმართება. ქართული საგალობლების და  ხალხური სიმღერების ფესტივალი  კი 14 ივლისს 19:00 სთ-ზე ნიკოსეული სასახლის ეზოში ჩატარდება. ხოლო 15 ივლისს,  ივერიის ღვთისმშობლის მშენებარე საკათედრო ტაძარში, კვართის გადაბრძანების ცერემონია გაიმართება. 15 ივლისს დაგეგმილი სხვა  ღონისძიებები  ჯერ  უცნობია. ამასთან, უცნობია ჩამობრძანდება თუ არა ზუგდიდში საქართველოს პატრიარქი ილია მეორე. თუმცა ცნობილია, რომ დღესასწაულში მონაწილეობას მიიღებენ მთავრობის წარმომადგენლები. ვლაქერნობის დღესასწაული 1990 წლიდან საქართველოს კათალიკოს პატრიარქის ლოცვა კურხევით საერთო სახალხო დღესასწაულად არის მიჩნეული. დღესასწაული ზუგდიდის დადიანების სასახლის მუზეუმში დაცულ სიწმინდეს, მარიამ ღვთისმშობლის კვართს ეძღვნება. იგი ყოველწლიურად 15 ივლისს იმართება. დღესასწაულს კვირეული  წელს პირველად ზუგდიდისა და ცაიშის ეპარქიის მიტროპოლიტის მეუფერ გერასიმეს ლოცვა კურთხევით მიეძღვნება. თუ რა თანხა იქნება კვირეულის ფარგლებში დაგეგმილი ღონისძიებებისთვის მუნიციპალიტეტის ბიუჯეტიდან გამოყოფილი გამგეობის ფინანსური სამსახურის უფროსი ნანი მიქენაია ვერ აკონკრეტებს, თუმცა მისივე განმარტებით 2013 წლის პროგრამულ ბიუჯეტში ვლაქერნობის დღესასწაულისთვის თანხები გათვალსიწინებულია.