ზუგდიდის მუნიციპალიტეტის სოფელ ნარაზენის მკვიდრი, ვალერიან ცაავას სამ სულიანი ოჯახი, გაუსაძლის საცხოვრებო პირობებს უჩივის. ცაავები ამბობენ, რომ მიუხედავად მძიმე სოციალური პირობებისა  მათ სოციალური დახმარება, გაურკვეველი მიზეზების გამო, მოუხსნეს. მათივე განმარტებით, ოჯახის ერთადერთი შემოსავლის წყარო მეზობლისგან ნათხოვარი ძროხა, 100 კგ-მდე თხილი და 50 კგ დაფნაა. ვალერიან ცაავა მეუღლესთან, ნანა ღურწკაიასთან და მცირეწლოვან შვილთან ერთად ავარიულ სახლში ცხოვრობს. მათი თქმით, წვიმის დროს  მათ საცხოვრებელ სახლში წყალი ჩამოდის, რის გამოც იატაკი და ფანჯრები დალპა. ვალერიან ცაავამ რადიო „ათინათთან“ საუბარში განმარტა, რომ მათი პრობლემებით მთავრობის წარმომადგენლები არასდროს დაინტერესებულან და თავი დღემდე მეზობლების დახმარებით გააქვთ. ცაავების ოჯახის მძიმე სოციალურ პირობებზე მეზობლებიც საუბრობენ.[gallery columns="4"] „შემეცოდნენ და ჩემი ძროხა ვათხოვე, რომ რძით ისარგებლონ. როცა წვიმს ბავშვი ჩემს სახლში მიმყავს დასაძინებლად, აქ ყველა ოთახში წყალი ჩამოდის“,- ამბობს რუბენ ქობალია. ვალერი ცაავა ჯანმღთელობის პრობლემასაც უჩივის. მას დიაბეტი აქვს და სტაციონალურ მკურნალობას საჭიროებს, თუმცა ოჯახს ამის სახსრები არ გააჩნია. ზუგდიდის სოციალური დახმარების სააგენტოში აცხადებენ, რომ ცაავების ოჯახის მდგომარეობა მათთვის კარგადაა ცნობილი. „ოჯახს 59 520 სარეიტინგო ქულა მიენიჭა, რაც ოჯახის მხოლოდ სამედიცინო პოლისით დაზღვევას ითვალისწინებს, დაზღვევა ძალაში ივლისის თვეში შევიდა", - აცხადებს სოციალური აგენტი შალვა ესართია. მისივე განმარტებით, ცაავების ოჯახის დეკლარაცია სრულყოფილადაა შევსებული, თუმცა ქულების მინიჭება თბილისში, სპეციალური პროგრამით  ხდება და ეს მათ კომპეტენციაში არ შედის.