„ნაციონალური მოძრაობის“ პრაიმერიზაციას ზუგდიდში ფიზიკური დაპირისპირება მოჰყვა. „ქართული ოცნების“ მხარდამჭერებმა „ნაციონალური მოძრაობის“ პრეზიდენტობის კანდიდატებს ცოცხებით, თოხებით, ბარებით და წყლით სავსე ბოთლებით დახვდნენ. აქციის მონაწილეები – „წადით, წადითს“ სკანდირებდნენ. მომიტინგეები აცხადებენ, რომ “ნაციონალურ მოძრაობას”, რომელსაც "ოკუპირებული ჰქონდა მთელი სამეგრელო, ზუგდიდში არაფერი ესაქმება". ადგილზე მობილიზებულია სამართალდამცავი ორგანოები. „ნაციონალური მოძრაობის“ პრაიმერი გიორგი ვაშაძემ გახსნა, რომელმაც მომხდარი ფაქტი დაგმო და მას სამარცხვინო უწოდა. პრაიმერი ზუგდიდის თეატრში ამ წუთებშიც გრძელდება. აქციის მონაწილეები მიმდებარე ტერიტორიაზე იმყოფებიან და შენობაში შეღწევას ცდილობენ, თუმცა ამის საშუალებას მათ პოლიცია არ აძლევს. ნაციონალური მოძრაობის წარმომადგენლებმა პრაიმერის დაწყებამდე სამეგრელო–ზემო სვანეთის ყოფილი გუბერნატორის თენგიზ გუნავას ოჯახის წევრები მოინახულეს. ცნობისთვის, დღეს ზუგდიდის შალვა დადიანის სახელობის ტეატრში "ნაციონალური მოძრაობა" საპრეზიდენტო კანდიდატის გამოსავლენად პრაიმერს მართავს.