ზუგდიდის მუნიციპალიტეტის სოფელ რიყის მოსახლეობას, რომელიც 7 თვეა სასმელი წყლის მიწოდებას ითხოვს, გაერთიანებული წყალმომარაგების კომპანია ჯერჯერობით ალტერნატივას ვერ სთავაზობს. შ.პ.ს. საქართველოს გაერთიანებული წყალმომარაგების კომპანიის ზუგდიდის სერვის ცენტრის ხელმძრვანელი დავით ფოცხევრია აცხადებს, რომ რიყის მოსახლეობის წყალთმომარაგების საკითხი რთულია და დიდ თანხებთან არის დაკავშირებული. „მე ამ საკითხზე რიგიონის მენეჯერ უკვე მივმართე. თუმცა ჩემთვის პასუხი არავის უცნობებია. ჩვენი მხრიდან სამწუხაროდ ჯერ არაფერი კეთდება“, - უთხრა რადიო „ათინათს“ დავით ფოცხვერიამ. მისივე განმარტებით, სოფელ რიყიდან ამოღებული წყლის მილების ნაწილი ზედაეწერი პოლიციის ეზოში ინახება, ნახევარზე მეტი კი დაიკარგა. ზუგდიდის მუნიციპალიტეტის გამგეობა, სოფლის მხარდამჭერი პროგრამის ფარგლებში, რამდენიმე ჭაბურღილის გაკეთებას გეგმავს, თუმცა მოსახლეობა მილების აღდგენას ითხოვს. ცნობისთვის, სოფელ რიყიდან სასმელი წყლის 3 კმ-მდე სიგრძის მილი, გასული წლის დეკემბერში, ჯერჯერობით დაუდგენელმა პირებმა თვითნებურად ამოიღეს. სამეგრელო - ზემო სვანეთის საოლქო პროკურატურაში აღნიშსნულზე სისხლის სამართლის საქმე 360 მუხლით არის აღძრული.