ზუგდიდის მუნიციპალიტეტის სოფელ ანაკლიაში ზღვის ნაპირსამაგრი ნაგეგბობის მშენებლობა იწყება. სამუშაოების დაწყებას საქართველოს რეგიონული განვითარებისა და ინფრასტრუქტურის მინისტრი დავით ნარმანია, მუნიციპალური განვითარების ფონდის აღმასრულებელი დირექტორი ელგუჯა ხოკრიშვილი, აზიის განვითარების ბანკის მუდმივი წარმომადგენელი საქართველოში ქათი ჯულიანი და ადგილობრივი ხელისუფლების წარმომადგენლები დაესწრნენ. ზუგდიდის მუნიციპალიტეტის სოფელ ანაკლიაში ნაპირდამცავ ნაგებობას მუნიციპალური განვითარების ფონდი აზიის განვითარების ბანკის დაფინანსებით ახორციელებს. ნაპირდამცავი ნაგებობის მშენებლობას კომპანია "მოდერნ ბიზნეს გრუპი" ანხორციელებს. პროექტი ორ ეტაპად განხორციელდება და ჯამში 4100 მეტრის ნაპირგამაგრება მოხდება. პროექტის ფარგლებში 10 ტალღმტეხი ნაგებობის ბეტონის ტეტრაპოდებით მოწყობა იგეგმება, რომელიც ზღვის ნაპირიდან 250-300 მეტრში 4 კმ სიგრძეზე ჩაიყრება და სანაპირო ზოლს დაიცავს. ნაგებობის მშენებლობის გარდა, ასევე იგეგმება სანაპირო ზოლის გაუმჯობესება და ქვიშის პლაჟის მოწყობა. ახალი სანაპირო ზოლი სამ კილომეტრამდე სიგრძის იქნება და მისი სიგანე 60 მეტრს მიაღწევს. სამუშაოების პირველი ეტაპის ღირებულება 15, 355, 551,74 ლარს მოიცავს, მშენებლობის ვადა 9-10 თვეა. რეგიონული განვითარებისა და ინფრასტრუქტურის მინისტრი დავით ნარმანიას განცხადებით ადგილზე დასაქმებულთა უმრავლესობა ადგილობრივი მაცხოვრებელი იქნება, მისივე თქმით სახელმწიფოს , დონორ ორგანიზაციებთან ერთად საჯარო ინფრასტრუქტურის განვითარება ინვესტორების მოზიდვას მნიშვნელოვნად შეუწყობს ხელს. ადგილზე დაგეგმილ პროექტს ანაკლიის მაცხოვრებლები დადებითად აფასებენ და აღნიშნავენ რომ პროექტის ფარგლებში დაგეგმილი მშენებლობები სოფელს მომავალში წყალდიდობებისა და დატბორვისგან იხსნის.