საქართველოს პრეზიდენტმა, მიხეილ სააკაშვილმა სამეგრელო–ზემო სვანეთის ყოფილი გუბერნატორი თენგიზ გუნავა შეიწყალა. შეწყალებაზე სპეციალური განცხადება პრეზიდენტის ინტერნეტ გვერდზე გამოქვეყნდა. რადიო "ათინათი" განცხადებას უცვლელად გთავაზობთ: "საქართველოს კონსტიტუციის 73-ე მუხლის პირველი პუნქტის ,,ო” ქვეპუნქტის შესაბამისად შეწყალებულ იქნეს თენგიზ გულის ძე გუნავა, დაბადებული 1976 წელს, მსჯავრდებული თბილისის საქალაქო სასამართლოს სისხლის სამართლის საქმეთა კოლეგიის 2013 წლის 12 ივლისის განაჩენით, საქართველოს სისხლის სამართლის კოდექსის 182-ე მუხლის მეორე ნაწილის „გ“, „დ“ ქვეპუნქტებით, 182-ე მუხლის მეორე ნაწილის „დ“ ქვეპუნქტით, ამავე მუხლის მესამე ნაწილის „ბ“ ქვეპუნქტით და გათავისუფლდეს სასჯელის (თავისუფლების აღკვეთა და თანამდებობის დაკავების უფლების ჩამორთმევა) შემდგომი მოხდისაგან და მოეხსნას ნასამართლობა." გავრცელებული ინფორმაციით სამეგრელოს გუბერნატორი თენგიზ გუნავა სამართლებრივ პროცედურებს გადის და ე.წ. მატროსოვის ციხეს რამდენიმე წუთში დატოვებს.