უხვმა ნალექმა დასავლეთ საქართველოს რამდენიმე რაიონში სერიოზული პრობლემები შექმნა, ადიდებულია რამდენიმე მდინარე, ზღვის ღელვა კი 2 მეტრს აღწევს. გარემოს ეროვნული სააგენტოს ჰიდრომეტეოროლოგიის დეპარტამენტის ცნობით განსაკუთრებით დიდი რაოდენობის ნალექი  ქობულეთსა და ქედაში დაფიქსირდა. ხოლო ფოთში ტალღების სიმაღლე 5-დან 6 ბალამდე გაიზარდა, ადგილზე გამართულად მუშაობს ყველა სატუმბი სადგური, რომელიც ქალაქიდან უხვი ნალექის გადატუმბვას უზრუნველყოფს ასევე  ადიდებულია მდინარე "აჭარის წყალი", რის გამოც ნათესები დაიტბორა, გზები კი დაზიანდა. მათივე ცნობით ადიდებულია მდინარე "ცხენისწყალიც" და გარკვეული პრობლემებია მოსალოდნელი ლენტეხის რაიონის სოფელ ლუჯში. მნიშვნელოვნად არის ადიდებული სოფელ ხაიშთან მდინარე ენგურიც. ბათუმში დაიტბორა რამდენიმე საცხოვრებელი სახლის პირველი სართული; თბილისში ხანმოკლე, ინტენსიური ნალექების შედეგად დაიტბორა რამდენიმე ქუჩა და შეფერხდა ავტოტრანსპორტის მოძრაობა. საგანგებო სიტუაციების დეპარტამენტის მიერ მოწოდებული ინფორმაციით, წყალსატუმბი სამუშაოები ჩატარდა ოზურგეთის, ქობულეთის და ბათუმის ცალკეულ ქუჩებზე. არსებული სინოპტიკური სიტუაციის ანალიზი უჩვენებს, რომ 5 სექტემბრის გვიან საღამომდე დასავლეთ საქართველოში გაგრძელდება ინტენსიური ნალექები, რამაც შესაძლებელია დასახლებული პუნქტების დატბორვები, მდინარეთა დონეების მნიშვნელოვანი აწევა და ცალკეულ მონაკვეთებზე წყალმოვარდნები გამიწვიოს. სანაპირო ზოლში გაძლიერდება ქარი და ზღვის სანაპიროზე ღელვა. შემდგომ დღეებში შესაძლებელია გააქტირდეს მეწყრული პროცესები. გარემოს დაცვის სამინისტროს მიერ გამოქვეყნებული ინფორმაცია მიმდინარე წლის 4-5 სექტემბერს განვითარებული არახელსაყრელი ჰიდრომეტეოროლოგიური მოვლენების და მათგან გამოწვეული უარყოფითი შედეგების შესახებ 5 სექტემბრის დილის 10 საათის მდგომარეობის მონაცემებს შეიცავს.